საბერძნეთი ქვეყნიდან 2 რუს დიპლომატს აძევებს, კიდევ ორს კი ქვეყანაში შესვლას უკრძალავს. ბერძნული მედიის ინფორმაციით, დიპლომატებს ქვეყნის შიდა საქმეებში ჩარევასი და ეროვნული უსაფრთხოების საწინააღმდეგო ქმედებებში ადანაშაულებენ.

ბერძნული მედია გაძევებული დიპლომატის ვინაობასაც ასახელებს, ეს არის რუსეთის საელჩოს თანამშრომელი ვიკტორ იაკოვლევი. მას და სხვა დიპლომატებს ინფორმაციის მოგროვებასა და ბერძენი ჩინოვნიკების მოსყიდვის მცდელობაში ადანაშაულებენ, კერძოდ საუბარია ფულადი ჯილდოებით საბერძნეთის მართლმადიდებელი ეკლესიის მიტროპოლიტებზე, ათონის მთის ბერებზე და ეკლესიის სხვა წარმომადგენლებზე გავლენის მოპოვებაზე, ისეთ მგრძნობიარე საკითხებთან დაკავშირებით, როგორიცაა მაგალითად მაკედონიის სახელის ცვლილება.

რუსული მედია ამ ფაქტთან დაკავშირებით რუსეთის საგარეო საქმეთა სამინისტროს კომენტარს ავრცელებს. უწყების განცხადებით, საბარძნეთიდან რუსი დიპლომატების გაძევებაზე პასუხი ‘სარკისებური“ იქნება, რაც გულისხმობს იმას, რომ რუსეთიც გააძევებს შესაბამისი რაოდენობის ბერძენ დიპლომატებს.