ერგნეთში ინციდენტების პრევენციისა და მათზე რეაგირების მექანიზმის სამუშაო ჯგუფის მორიგი შეხვედრა გაიმართა. მიუხედავად იმისა, რომ ქართული მხარის მიერ დაყენებული ერთ-ერთი მთავარი საკითხი არჩილ ტატუნაშვილისნ მკვლელობის დეტალების განხილვა იყო, ტატუნაშვილის ცხედრიდან ამოცლილი შინაგანი ორგანოების გადმოცემის საკითხი კვლავ ღია რჩება. სახელმწიფო უსაფრთხოების სამსახურის საინფორმაციო-ანალიტიკური დეპარტამენტის ხელმძღვანელის მოადგილის, ირაკლი ანთაძის განცხადებით, არჩილ ტატუნაშვილის ორგანოების გადმოცემა პრინციპულად მნიშვნელოვანი საკითხია.

„მე არ გახლავართ ექსპერტი, მაგრამ სრულყოფილად ექსპერტიზის ჩატარებისთვის საჭიროა გარკვეული რაოდენობით არსებობდეს ფრაგმენტები. შემდგომი კომენტარი უმჯობესია, გააკეთოს შესაბამისმა უწყებამ. პრიორიტეტს წარმოადგენს კვლავ შინაგანი ორგანოების გადმოცემის საკითხი,"- განაცხადა ირაკლი ანთაძემ.

შეხვედრაზე საუბარი იყო „ოთხოზორია-ტატუნაშვილის სიაზეც“ , ირაკლი ანთაძის განცხადებით, ქართულმა მხარემ საოკუპაციო რეჟიმს კიდევ ერთხელ განუმარტა სიის შექმნის მიზეზი.

"ოთხოზორია-ტატუნაშვილის სიასთან დაკავშირებით კიდევ ერთხელ განემარტათ, რომ აღნიშნული წარმოადგენს პოლიტიკურ აქტს და არ შეიძლება ეს გამოყენებული იქნას პოლიტიკური ინსუნაციების მიზნით. აქ არის შესული ყველა ის პირი, რომლებსაც აქვთ ჩადენილი მშვიდობიანი ქართული მოსახლეობის წინააღმდეგ.“- განაცხადა ანთაძემ.