ბელორუსში უკრაინელ "კიბორგებზე" გადაღებულ ფილმს ოვაციებით შეხვდნენ

მსოფლიო - 16:21, 09 Jul, 2018

2548

ბელორუსში დედაქალაქის კინოთეატრში უკრაინელი რეჟისორის აჰმედ საიტაბლაევის ცნობილი ფილმი „კიბორგები“ უჩვენეს, რომელიც დონეცკის აეროპორტის გმირი დამცველების შესახებაა გადაღებული, რომლებიც აეროპორტს რუსი ოკუპანტებისგან 8 თვის განმავლობაში იცავდნენ.

უკრაინის საელჩოს ინფორმაციით, ჩვენება ორგანიზებული იყო ბელორუსში უკრაინის კულტურის დღეების ფარგლებში.

ფილმის დასრულების შემდეგ ფინალურ ტიტრებს მთელი დარბაზი ფეხზე დამდგარი, ოვაციებით შეხვდა.

ფილმი „კიბორგები - გმირები არასდროს კვდებიან“ კინოგაქირავებაში 2017 წლის 7 დეკემბერს გამოვიდა.

ფილმში ნაჩვენებია 2014 წლის სექტემბერში 2 კვირიანი საბრძოლო მორიგეობის ისტორია. სამხედრო მოხალისეთა ჯგუფი პირველად ჩადის დონეცკის აეროპორტში, რომელიც სტრატეგიულად მნიშვნელოვან ობიექტს წარმოადგენს და რომლის დაცვაც იმ დროისთვის უკვე მეოთხე თვეა გამუდმებული ბრძოლების პირობებში მიმდინარეობს.

ახალჩასულებს შორის არის მოხალისე ზედმეტსახელად „მაჟორი“, რომელიც მდიდარი მშობლების შვილია და ომში გამოიპარა. მასთან ერთად რამდენიმე სამხედროა, რომელთა ისტორიაც დაფუძნებულია აეროპორტის დამცველთა ნამდვილ ამბებზე.

„კიბორგები“ ერთ-ერთი ყველაზე ძვირადღირებული უკრაინული პროექტია, მისმა ბიუჯეტმა 48 მილიონი გრივნა შეადგინა, საიდანაც 24 მილიონი სახელმწიფო კინოცენტრის მიერაა დაფინანსებული.

ფილმი უკრაინის დამოუკიდებლობის პერიოდიდან მოყოლებული კინოგაქირავების აბსოლუტურ რეკორდსმენად იქცა.