ლადო ჭანტურია „ოცნებას“ საპრეზიდენტო კანდიდატობაზე არ თანხმდება

ლადო ჭანტურია „ოცნებას“ საპრეზიდენტო კანდიდატობაზე არ თანხმდება - წარუმატებელი კულუარული მოლაპარაკებები

პოლიტიკა - 11:55, 09 Jul, 2018

2594

„ქართული ოცნება“ საპრეზიდენტო კანდიდატს ეძებს. სხვადასხვა დროს სხვადასხვა პიროვნება სახელდებოდა, მაგრამ როგორც „ნიუპოსტს“ კონფიდენციალური წყარო ეუბნება, მმართველ გუნდს ამ დრომდე ისეთი პიროვნება ვერ უპოვია, რომელსაც საპრეზიდენტო მარათონში ჩართავს.

არსებული კულუარული ინფორმაციით, „ოცნებას“ არჩევანის გაკეთება შესაძლოა, ორ კანდიდატს შორის - ინფრასტრუქტურის მინისტრ მაია ცქიტიშვილსა და სტრასბურგის სასამართლოს მოსამართლეს, ლადო ჭანტურიას შორის მოუწიოს, თუმცა როგორც ჩვენ გვეუბნებიან, ჭანტურია არ თანხმდება, რომ საპრეზიდენტო კანდიდატი იყოს. იმ შემთხვევაში, თუ ჭანტურიასთან მოლაპარაკებები წარუმატებლად დამთავრდება, მაშინ „ოცნება“ იძულებული გახდება, „სტავკა“ მაია ცქიტიშვილზე დადოს.
რაც შეეხება ლადო ჭანტურიას, „ვარდების რევოლუციამდე“ მას საქართველოს უზენაესი სასამართლოს თავმჯდომარის თანამდებობა ეკავა. ასევე, არსებობს ინფორმაცია, რომ ჭანტურიას გარკვეული ურთერთობა ჰქონდა მაშინდელ რევოლუციონერებთან და სწორედ ამ ურთიერთობის შედეგი იყო, რომ სასამართლომ მხოლოდ 2003 წლის 2 ნოემბრის პროპორციული არჩევნების შედეგები გააუქმა, მაჟორიტარული არჩევნების შედეგი კი ძალაში დატოვა.
„ოცნების“ ხელისუფლებაში მოსვლის შემდეგ, 2013 წელს, ჭანტურია გერმანიაში საქართველოს ელჩად გაამწესეს. გასული წლის დეკემბერში კი ჭანტურია ევროპის ადამიანის უფლებათა სასამართლოს მოსამართლე გახდა. ევროპარლამენტის ასამბლეამ ის სამ კანდიდატს შორის აირჩია.
ჭანტურია ადამიანის უფლებათა ევროპულ სასამართლოში 9-წლიანი ვადით იმუშავებს. ალბათ, სწორედ ეს არის მიზეზი, რის გამოც „ოცნებას“ არ თანხმდება და პრეზიდენტობაზე უარს ამბობს.