გიორგი ვაშაძის 7 ინიციატივა - რევოლუციური გარღვევა უკრაინის ეკონომიკაში

პოლიტიკა - 18:17, 07 Jul, 2018

1935

უკრაინის ეკონომიკური მოდერნიზაციის აქტი 7 ძირითადი პუნქტისგან შედგება. ინიციატივებზე, „ინოვაციებისა და განვითარების ფონდის" ექსპერტებმა იმუშავეს. რა რეკომენდაციებს გულისხმობს დოკუმენტი და როდის უნდა დასრულდეს პროექტზე მუშაობა, ამაზე ფონდის დამფუძნებელმა, გიორგი ვაშაძემ ისაუბრა. „დოკუმენტში წარმოვადგინეთ 7 მთავარი ინიციატივა, უკრაინის ეკონომიკური მოდერნიზაციისთვის. ეს არის რევოლუციური გარღვევა, რომელიც სრულიად გარდაქმნის ქვეყნის ეკონომიკას და დაანგრევს დღემდე არსებულ კორუფციულ სქემას. ეს ნიშნავს თავისუფალ ბაზარს, სწრაფ ეკონომიკურ ზრდას და დამატებით სამუშაო ადგილებს. ამ დრომდე, ნებისმიერი გადარიცხვები როგორც ქვეყნის შიგნით, ასევე ქვეყნის გარეთ, დაკავშირებული იყო უზარმაზარ პრობლემებგან. დიდ სირთულეს წარმოადგენდა ასევე ნებისმიერი პროდუქციის ექსპორტზე გატანის საკითხიც. ფაქტიურად, ეს იყო ერთგვარი კარცერი ბიზნესისთვის, რაც 1993 წელს მიღებული რეგულაციის შედეგია. ჩვენს მიერ შემუშავებული ინიციატივების თანახმად, მაქსიმალურად გამარტივდა სატრანსფერო ოპერაციები. აღსანიშნავია ასევე, რომ 2019 წლიდან ბიზნესში რეინვესტირებული ფინანსები არ დაიბეგრება. მიიღება ახალი კანონი, რომელიც საშუალებას მოგვცემს, გაკოტრების პროცედურა განხორციელდეს ისე, რომ ერთი მხრივ, უზრუნველყოფილი იქნება კრედიტორების უფლებათა საიმედო დაცვა და მათი მოთხოვნების მაქსიმალური დაკმაყოფილება, მეორე მხრივ კი, მოვალეს მიეცემა საკუთარი ბიზნესის გადარჩენისა და დავალიანების დაფარვის შესაძლებლობა. საკანონმდებლო დონეზე დაფუძნდება ბიზნეს ომბუდსმენის ინსტიტუტი, რომელიც იქნება შუამავალი რგოლი, რომელიც დაეხმარება მეწარმეებს სამეწარმეო საქმიანობაში და დაიცავს მათ უფლებებს. ეკონომიკური დანაშაულებების გამოძიების მიზნით, ერთიანი ანალიტიკური ორგანო ჩამოყალიბება, რომლის იურისდიქციაშიც მოექცევა ეკონომიკურ დანაშაულთან დაკავშირებული ყველა საქმე. პროექტზე საბოლოო მუშაობა 2019 წელს დასრულდება თუმცა, ვფიქრობ, რომ პირველი შედეგი უკვე 6 თვეში გვექნება"- განაცხადა გიორგი ვაშაძემ. უკრაინის ეკონომიკური მოდერნიზაციის აქტი, უკრაინის პრეზიდენტმა პეტრო პოროშენკომ 4 ივლისს დაამტკიცა. ღონისძიებას ბიზნეს-ასოციაციის წევრები, პრეზიდენტის რეზიდენციის წარმომადგენლები და მოწვეული სტუმრები დაესწრნენ.