"როცა სტიქია ხდება, მაშინ კი არ უნდა ვიფიქროთ, წინასწარ უნდა განვსაზღვროთ, როგორ დავაღწიოთ თავი" - პატრიარქი ქადაგებაში სვანეთის წყალდიდობას გამოეხმაურა

პოლიტიკა - 15:52, 07 Jul, 2018

1528

მართლმადიდებელი ეკლესია დღეს იოანე ნათლისმცემლის შობის დღეს აღნიშნავს. დღესასწაულთან დაკავშირებით გამართულ პარაკლისზე საქართველოს კათოლიკოს-პატრიარქმა იქადაგა და შეკრებილ საზოაგდოებას დღესასწაული მიულოცა. ილია მეორე სვანეთში განვითარებულ მოვლენებსაც გამოეხმაურა და სტიქიებთან ბრძოლისას მეცინიერების მნიშვნელობას გაუსვა ხაზი. პატრიარქის თქმით, აუცილებელია არსებობდეს სათანადოდ აღჭურვილი სპეციალური უწყება, რომელიც მსგავს საფრთხეებს წინასწარ განსაზღვრავს და მოსახლეობას ზარალის თავიდან ააცილებს.

„სიხარული და მწუხარება ტყუპი ძმებივით არიან. დღეს არის სასიხარულო დღე, წმინდა იოანე ნათლისმცემლის შობა და დღესვე არის მძიმე დღე. თქვენ იცით, სვანეთში წყალდიდობა მოხდა, წაიღო ხიდები, რამდენიმე სახლი. მადლობა ღმერთს, რომ მსხვერპლი არაა და ჩვენ შევთხოვთ წმინდა იოანე ნათლისმცემელს, რომ მშვიდობა მოგვანიჭოს, დღეს კიდევ ერთხელ უნდა ვიფიქროთ, როგორ დავიცვათ თავი სტიქიური მოვლენებისაგან. ისინი გარდაუვალია, მაგრამ ამავე დროს ჩვენ უნდა შევქმნათ სამეცნიერო ცენტრი, ინსტიტუტი, რომელიც ყოველთვის კონტროლის ქვეშ ამყოფებს ამ სტიქიურ მოვლენებს. როდესაც ისინი ხდება, მაშინ კი არ უნდა ვიფიქროთ, წინასწარ უნდა განვსაზღვროთ, როგორ დავაღწიოთ თავი. მე ვფიქრობ, ჩვენი ხელისუფლება და მეცნიერები ყველაფერს გააკეთებენ, რომ სძლიონ ამ მოვლენებს. წმინდა იოანე ნათლისმცემელი შეგეწიოთ თქვენ და სრულიად საქართველოს.“ - განაცხადა ილია მეორემ.