„იმისთვის, რომ რუსთაველზე ტრაგიკულ ისტორიებს არ ვისმენდეთ, საზოგადოებრივი ნდობით აღჭურვილი პროკურორი გვჭირდება“ - პრეზიდენტი პროკურორის შერჩევის პროცესით უკმაყოფილოა

პოლიტიკა - 11:15, 07 Jul, 2018

1525

საქართველოს პრეზიდენტის განცხადებით, მთავარი პროკურორის კანდიდატების შერჩევის პროცესი აქტიური საჯარო განხილვებით უნდა წარმართულიყო, რაც არ მომხდარა. გიორგი მარგველაშვილი პროცესით უკმაყოფილოა, მისი განცხადებით, კონკრეტული კანდიდატურების განხილვა არის გაქცევა იმ საკითხიდან, რომელიც პროკურატურაში არსებულ პრობლემებთან დაკავშირებით საზოგადოებამ დააყენა.

„კანდიდატურების განხილვა და კანდიდატურებზე მსჯელობა არის ზურგის შექცევა და გაქცევა იმ მთავარი საკითხიდან, რომელიც საზოგადოებამ ნათლად და აქტუალურად დააყენა და ეს საკითხი მდგომარეობდა შემდგომში, რომ უნდა მოხდეს პროკურატურის დეპოლიტიზაცია. უნდა განხორციელდეს მთავარი პროკურორის შერჩევა ისე, რომ ჰქონდეს საზოგადოების მაღალი ნდობა, უნდა მომხდარიყო ამ ხნის განმავლობაში საჯარო კონსულტაციები, მე რამდენადაც ვაკვირდები პოლიტიკურ პროცესს, ასეთი საჯარო კონსულტაციები და აქტიური საჯარო განხილვა არ მომხდარა ისე მოხდა კანდიდატურებზე მსჯელობა. შესაბამისად ცალკე კანდიდატურებზე მსჯელობა არის გაქცევა საზოგადოების მთავარი შეკვეთიდან, რომ ეს იყოს მაღალი საზოგადოებრივი ნდობით აღჭურვილი პროფესიონალი.

აქვე გაგახსენებთ იმ მსჯელობას, არასამთავრობო ორგანიზაციების მიერ რა საკითხებიც იყო წამოწეული. უცებ ეს საკითხები გვერდზე გადაიდო და დავიწყეთ მსჯელობა კონკრეტულ კანდიდატურებზე. მე არც ერთის მიმართ პოზიციას არ დავაფიქსირებ, მთავარია პროცესი როგორ განხორციელდება.

პროკურატურის სისტემას უნდა ჰქონდეს მაღალი საზოგადოებრივი ნდობა. იმისთვის, რომ ჰქონდეს მაღალი საზოგადოებრივი ნდობა და ჩვენ არ ვისმენდეთ რუსთაველის გამზირზე ტრაგიკული ისტორიების მთელ საგას, რომლის მოსმენაც სამწუხაროდ ჩვენ მოგვიხდა, ამისთვის ჩვენ გვჭირდება საზოგადოებრივი ნდობით აღჭურვილი მთავარი პროკურორი, რომელსაც გარდა მაღალი სანდოობისა, ექნება შესაძლებლობა, სისტემის შინაარსობრივი რეფორმა განახორციელოს.“ - განაცხადა გიორგი მარგველაშვილმა.