შექმნილი ვითარება ნენსკრა ჰესის მშენებლობას არ უკავშირდება

შექმნილი ვითარება ნენსკრა ჰესის მშენებლობას არ უკავშირდება - ნენსკრა ჰიდრო

პოლიტიკა - 16:09, 05 Jul, 2018

1354

ჭუბერში არსებულ მდგომარეობასთან დაკავშირებით "ნენსკრა ჰიდრო" საგანგებო განცხადებას ავრცელებს.

"ნენსკრას ჰიდროელექტროსადგურის პროექტის განმახორციელებელი კომპანია სს „ნენსკრა ჰიდრო“ მესტიის მუნიციპალიტეტის სოფელ ჭუბერში არსებულ ვითარებასთან დაკავშირებით განცხადებას ავრცელებს.

ჩვენს ხელთ არსებული ინფორმაციით, ა.წ. 5 ივლისს მესტიის მუნიციპალიტეტის სოფელ ჭუბერში, მდინარე ნენსკრას ერთ-ერთ შენაკადზე განვითარებული სტიქიური მოვლენის გამო, დაიტბორა სოფელ ჭუბერის ცენტრალური ნაწილი, ასევე დაზიანებულია გზები და ხიდები.

მედიაში გავრცელებული ინფორმაციით, შექმნილი სიტუაცია ნენსკრა ჰესის მშენებლობას უკავშირდება.

გვსურს განვმარტოთ, რომ 2018 წლის დასაწყისიდან დღემდე ნენსკრა ჰესის მოსამზადებელი სამუშაოები არის სრულიად გაჩერებული. აღნიშნული სამუშაოები გულისხობდა მხოლოდ არსებული გზების და ხიდების რეაბილიტაციას. გარდა ამისა, სტიქიური მოვლენა წარმოიშვა სამშენებლო ტერიტორიიდან 5 კილომეტრის ქვემოთ მდინარის მიმართულებით.

შესაბამისად შექმნილი ვითარება ნენსკრა ჰესის მშენებლობასთან არანაირი კავშირი არ აქვს.

ამ მომენტისთვის სს „ნენსკრა ჰიდროს“ თანამშრომლებს აქვთ უწყვეტი კომუნიკაცია ადგილობრივ მოსახლეობასთან. შესაძლებლობების ფარგლებში, კომპანიის მიერ სასწრაფო წესით იქნება მობილიზებული ტექნიკა, რათა შესაბამისი დახმარება აღმოვუჩინოთ ადგილობრივ მოსახლეობას" - აღნიშნულია "ნენსკრა ჰიდროს" განცხადებაში.

ჭუბერში, სადაც მაშტაბურ ჰიდრო სადგურ ნენსკრაჰესს აშენებენ, ცოტა ხნის წინ მთა მოწყდა. მდინარის კალაპოტი ნაწილობრივ ჩახერგა.

წაღებულია 4 ხიდი და მოსახელობა, რომლის სახლებსაც ახლა დატბორვა ემუქრება, გარესამყაროს მოწყვეტილია. ჯერჯერობით, უცნობია, არიან თუ არა დაშავებულები ან დაღუპულები.