რუსეთის მოქალაქემ მომწამვლელი ნივთერება თბილისის აეროპორტის “აეროფლოტის” ოფისში დაასხა

რუსეთის მოქალაქემ მომწამვლელი ნივთერება თბილისის აეროპორტის “აეროფლოტის” ოფისში დაასხა - ახალი დეტალები

პოლიტიკა - 12:08, 05 Jul, 2018

1249

საქართველოს აეროპორტების გაერთიანების საინფორმაციო სამსახურის უფროსის, გიორგი გოგლიძის ინფორმაციით, 2 ივლისს “აეროფლოტის” თანამშრომელმა ოფისში უსიამოვნო სუნი შენიშნა და ტექნიკური გჯუფი გამოიძახა.

მისივე ინფორმაციით, შემთხვევა “აეროფლოტის” ოფისში მოხდა.

“უსიამოვნო სუნი გამოდიოდა ოთახიდან, “აეროფლოტის” ოფისიდან. გავუშვით შესაბამისი ტექნიკური ჯგუფი ადგილზე. პირველი დათვალიერება მოხდა მათ მიერ და შემდგომ გამოვიძახეთ შსს-ს თანამშრომლები. ის ადამიანები, ვისაც აღენიშნებოდა ინტოქსიკაცია, არიან ჩვენი ტექნიკური ჯგუფი, რომლებიც უშუალოდ იმყოფებოდნენ ამ ოფისში და მათ უტარდებათ შესაბამისი გამოკვლევები”, - განაცხადა გოგლიძემ “ქრონიკასთან” საუბარში.

რაც შეეხება დაშავებულებს, თბილისის აეროპორტში მოწამლული ერთი ადამიანი კვლავ საავადმყოფოში რჩება. სულ დაშავებულია 8 ადამიანი.

სახელმწიფო უსაფრთხოების სამსახურის ინფორმაციით, 2 ივლისს თბილისის საერთაშორისო აეროპორტში კონტრდაზვერვის დეპარტამენტის თანამშრომლებმა რუსეთის ფედერაციის მოქალაქე დააკავეს.

უწყებაში აცხადებენ, რომ ბრალდებულმა 2018 წლის 2 ივლისს თბილისის საერთაშორისო აეროპორტში, გაფრენის დარბაზში მდებარე ერთ-ერთი ავიაკომპანიის სალაროს ოფისში, ჯანმრთელობისთვის მავნე ნივთიერების შემცველი სითხე დააქცია.

ამასთან გუშინ სუს-ში „ნიუპოსტს“ არ უპასუხეს კითხვაზე, რა ნივთიერებით მოიწამლნენ აეროპორტის თანამშრომლები.

უწყებაში არც იმას აკონკრეტებენ რა მუხლით მიმდინარეობს გამოძიება.