"ხელისუფლების სახიფათო ექსპერიმენტები აჭარაში, ხაბაძე-პატარაძე დამნაშავეთა ჯაჭვია" - ოპოზიცია "კვირიკაშვილის კლანის ახალი კლანით" ჩანაცვლებაზე საუბრობს

პოლიტიკა - 12:10, 04 Jul, 2018

1137

აჭარის ოპოზიცია აჭარის მთავრობის გადადგომის მიზეზებზე საუბრობს. მათი თქმით, პატარიძე კვირიკაშვილის კადრი იყო და სწორედ ამიტომ გაუშვეს თანამდებობიდან.

„კვირიკაშვილის კლანი ახალი კლანით ჩანაცვლდა. ივანიშვილმა გაუშვა კვირიკაშვილი, ახლა მიადგა და მის კადრებსაც ხსნის თანამდებობიდან,“- განაცხადა ”ერთიანი ნაციონალური მოძრაობის” ბათუმის რაიონული ორგანიზაციის თავმჯდომარემ, გიორგი კირთაძემ.

აჭარის ავტონომიური რესპუბლიკის უმაღლესი საბჭოს წევრის, პეტრე ზამბახიძის განცხადებით, „რეგიონის ლიდერები პირდაპირ დამოკიდებულებაში არიან ივანიშვილის ხელისუფლებასა და ივანიშვილზე და არა მოსახლეობის წინაშე არიან ანგარიშვალდებულნი და არა უმაღლესი საბჭოს წინაშე".

მისივე შეფასებით, "ეს ასე თუ გაგრძელდა, მოსახლეობის მდგომარეობა კიდევ უფრო გაუარესდება".

მოსალოდნელ ცვლილებებზე საუბრობს, პოლიტიკურ მეცნიერებათა დოქტორი, თბილისის პოლიტიკური სწავლების სკოლის დამფუძნებელი და დირექტორი, არმაზ ახვლედიანიც.

"როგორც ჩანს, საქართველოს ხელისუფალთ ძალიან არ უყვართ აჭარა. მათ არ უყვართ საქართველო. ასეთი წარუმატებელი და სახიფათო ექსპერიმენტები, რომელიც ჩვენს რეგიონში ტარდება, ვფიქრობ, რომ დანაშაულის ტოლფასია. ხაბაძე, პატარაძე - ეს არის დამნაშავეთა ჯაჭვი. დანაშაულზე ვსაუბრობ იმ ადამიანთა მხრიდან, რომლებიც ასე იღებენ გადაწყვეტილებას და რეგიონში ასეთ ბატონებს მოავლენენ"- ამბობს ახვლედიანი.

აჭარის მთავრობის თავმჯდომარე ზურაბ პატარაძე თანამდებობას ტოვებს. 15:00 საათზე ზურაბ პატარაძე საგანგებო განცხადებას გააკეთებს.