ბრიტანეთის უილტშირის საგრაფოს პოლიცია სერიოზული ინციდენტის შესახებ იტყობინება. სოლსბერისთან ახლოს, ქალაქ ეიმსბერიში 40 წლის მამაკაცი და ქალი საკუთარ სახლში უგონო მდგომარეობაში ნაცნობებმა იპოვეს. ვრცელდება ინფორმაცია, რომ ისინი „დაუდგენელი ნივთიერებით“ მოიწამლნენ, ისინი საავადმყოფოში არიან გადაყვანილნი.

თავდაპირველად ექიმები ვარაუდობდნენ, რომ ქალი და მამაკაცი შესაძლოა ნარკოტიკული საშუალებით ყოფილიყვნენ მოწამლული, თუმცა ჩატარებულმა ანალიზებმა ეს არ დაადასტურა, ამ დროისთვის მათ დამატებითი გამოკვლევები უტარდებათ.

ამ დროისთვის სამართალდამცავები დასკვნების გაკეთებისგან თავს იკავებენ. ყველა იმ ადგილზე , რომელსაც ეს ქალი და მამაკაცი ხშირად სტუმრობდა უსაფრთხოების დამატებითი ზომებია მიღებული.

შეგახსენებთ, მარტის დასაწყისში, ქალაქ სოლსბერიში რუსეთის დაზვერვის სახელმწიფო სამმართველოს ყოფილი ოფიცერი, სერგეი სკრიპალი და მისი შვილი იულია მოწამლეს. დიდმა ბრიტანეთმა აღნიშნულ საქმეში პასუხისმგებლობა რუსეთს დააკისრა.