თავდაცვის სამინისტროს სკანდალური ტენდერი - უშიშროების საბჭოს მდივანი პარლამენტს საკითხით დაინტერესებისკენ მოუწოდებს

პოლიტიკა - 10:54, 04 Jul, 2018

834

საქართველოს ეროვნული უშიშროების საბჭოს მდივნი თავდაცვის სამინისტროს სკანდალურ ტენდერთან დაკავშირებით განცხადებას ავრცელებს.

დავით რაქვიაშვილი მიზანშეწონილად მიიჩნევს პარლემენტის თავდაცვისა და უშიშროების კომიტეტი და ნდობის ჯგუფი დაინტერესდეს და გამოიკვლიონ აღნიშნული საკითხი.

"ბოლო დღეებში, ქართულ საზოგადოებაში აქტიურად განიხილება საქართველოს თავდაცვისა და შინაგან საქმეთა სამინისტროებისა და სხვა სახელმწიფო სტრუქტურების მიერ განხორციელებული შესყიდვები, როდესაც ქვეყნის უსაფრთხოებაზე პასუხისმგებელი უწყებების გამოცხადებულ ტენდერებში გამარჯვებული ჯაშუშობისთვის გასამართლებულ პირთან დაკავშირებული ორგანიზაცია აღმოჩნდა.

თავდაცვის სამინისტროს მტკიცებით, სახელმწიფო შესყიდვებთან დაკავშირებული პროცედურები არსებული კანონმდებლობის მოთხოვნების შესაბამისად განხორციელდა. შესაბამისად, ირკვევა, რომ არსებული პრაქტიკა არ გამორიცხავს ამ ტიპის შემთხვევების არსებობას წარსულში, ისევე, როგორც მათი გამეორების შესაძლობას.

აქედან გამომდინარე, ამ ეტაპზე მიზანშეწონილი იქნება, თუკი პარლამენტის თავდაცვისა და უშიშროების კომიტეტი და ნდობის ჯგუფი, საპარლამენტო კონტროლის მექანიზმის ფარგლებში, დაინტერესდებიან და გამოიკვლევენ როგორც ამ კონკრეტულ, ასევე ეროვნული უსაფრთხოებისთვის პოტენციურად საზიანო სხვა შესაძლო შემთხვევებს და შეიმუშავებენ კონკრეტულ წინადადებებს, რომლებიც მიმართული იქნება შესყიდვების მოქმედი პრაქტიკისა და კანონმდებლობის დახვეწაზე იმ ნაწილში, რაც პირდაპირაა დაკავშირებული ქვეყნის უსაფრთხოების უზრუნველყოფის ამოცანებთან.

წინააღმდეგ შემთხვევაში, ქვეყნის თავდაცვიუნარიანობასთან დაკავშირებულ საკითხებზე საქართველოს ინტერესების წინააღმდეგ მოქმედ პირებთან და/ან კომნპანიებთან „კანონიერმა“ თანამშრომლობამ, შესაძლოა მნიშვნელოვანი უარყოფითი გავლენა მოახდინოს იმ ნდობაზე, რომლითაც საქართველოს თავდაცვის სამინისტრო ქართულ საზოგადოებაში, სრულიად დამსახურებულად, სარგებლობს და აქედან გამომდინარე, წარმოქმნას ნეგატიური დამოკიდებულება, როგორც კონკრეტული სახელმწიფო უწყებების, ასევე მთლიანად ქვეყნის უსაფრთხოების სისტემის მიმართ" - აღნიშნულია უშიშროების საბჭოს მდივნის განცხადებაში.