ირანის სამოქალაქო თავდაცვის სამსახურის დირექტორი გოლამრეზა ჯალალი ისრაელს და კიდევ ერთ "მეზობელ ქვეყანას" კლიმატური ომის გაჩაღებაში ადანაშაულებს. ირანელი ჩინოვნიკი სამოქალაქო თავდაცვასთან დაკავშირებით გამართულ პრესკონფერენციაზე გამოვიდა და ქვეყნის აგრარულ რაიონებთან დაკავშირებით ისაუბრა. ქვეყანაში არსებულ გვალვებთან დაკავშირებით ჯალალიმ განაცხადა, რომ ირანის კლიმატი გარე ჩარევების შედეგად შეიცვალა. როგორც ირანული სააგენტო Tasnim-ი იტყობინება, გოლამრეზა ჯალალი წვიმის არარსებობას "მტრების მაქინაციების" შედეგს უწოდებს.

გოლამრეზა ჯალალის თქმით, ისრაელი "ირანის ერთ-ერთ მეზობელ ქვეყანასთან" ერთად ზემოქმედებას ახორციელებს წვიმის ღრუბლებზე, რომელიც ირანისკენ მიემართება და ამ ზემოქმედების შედეგად წვიმის მოსვლის შესაძლებლობას სპობს. მეორეს მხრივ, ირანის არამეგობარი ქვეყნები "იტაცებენ" ღრუბლებს, რომლებსაც ბუნებრივი ნალექი გადააქვთ.

ადრე გავრცელდა ინფორმაცია, რომ შაბათს, 30 ივნისს, ქალაქ ჰორამშაჰრეში, რომელიც ირანის სამხრეთ ნაწილში მდებარეობს, მასობრივი საპროტესტო აქციები გაიმართა, რომელიც სასმელი წყლის უკმარისობას უკავშირდებოდა. პოლიციამ მომიტინგეების დასაშლელად ძალა და რეზინის ტყვიები გამოიყენა.