"კოსმეტიკური ცვლილებები" - ოპოზიცია მთავრობის სტრუქტურულ ცვლილებებს მხარს არ დაუჭერს

პოლიტიკა - 12:34, 03 Jul, 2018

722

პარლამენტში, რამდენიმე კომიტეტის გაერთიანებული სხდომა, სადაც მთავრობის სტრუქტურულ ცვლილებებს განიხილავდნენ, ხმაურის ფონზე მიმდინარეობს.

„ევროპული საქართველოს“ წევრმა, ზურაბ ჭიაბერაშვილმა სიტყვით გამოსვლისას აღნიშნნა, რომ ცვლილებები არის მხოლოდ კოსმეტიკურია.

„ეს არის კოსმეტიკური ცვლილებები. სამინისტროების რიცხვი და რაოდენობა არ არის კავშირში მცირე მთავრობასთან, თუ მთავრობა ისევე ერევა ეკონომიკაში, როგორც ჩვენ ვხედავთ ბოლო წლებში. წარმოდგენილი ცვლილებები არ პასუხობს, რაც ჩვენ ქვეყანას სჭირდება“, - განაცხადა ჭიაბერაშვილმა.

ჯანდაცვის კომიტეტის თავმჯდომარემ, აკაკი ზოიძემ კი ჭიაბერაშვილს მოუწოდა მითები „შვილებსა და შვილიშვილებს“ მოუყვეს.

„თქვენ ეკონომიკური ზრდის პირობებში გეზრდებოდათ სიღარიბე. 2013 წლის შემდეგ სიღარიბე შემცირებულია. ცნობილი მითების შემქმნელია ბატონი ზურაბი. მცირე მთავრობა ნიშნავს იმას, რასაც გვთავაზობს ბატონი პრემიერი. ტყუილებს იძახით ბატონო ზურაბ. თქვენ რასაც ამბობთ მაგას ჰქვია მცირე სახელმწიფო და არა მცირე მთავრობა.

ჯანდაცვა თქვენ არ გინდათ, განათლება არ გინდათ და დაგვანებე თავი. მცირე მთავრობა არის არა მხოლოდ სამინისტროების გაერთიანება, არამედ კონცეფცია, რომელსაც ჩვენ ვატარებთ. ადმინისტრაციული ხარჯები შემცირდება, სამინისტროების ოპტიმიზაცია მოხდება, რაც მოიტანს, რომ ნაკლები დანახარჯი წავა ადმინისტრაციაზე და უფრო მეტი მოხმარდება ადამიანს. მითები ბატონო ზურაბ, თქვენს შვილებს და შვილიშვილებს მოუყევით“, - განაცხადა ზოიძემ.