"აქცია მე არ დამიგეგმავს, თუ ვინმეს სურს სამართლიანობის აღსადგენად ბრძოლა, გზას არავის ვუკეტავ"- სარალიძე მხარდამჭერ აქციაზე

პოლიტიკა - 11:03, 03 Jul, 2018

1455

ხორავას ქუჩაზე მოკლული დავით სარალიძის მამა, ზაზა სარალიძე შინაგან საქმეთა სამინისტროში პროტესტს განაგრძობს. მისი თქმით, 19:00 საათზე დაგეგმილი აქციის ორგანიზატორი თავად არ არის.

"აქცია მე არ დამიგეგმავს გამომდინარე იქიდან, რომ ხალხს აღარ ვაწუხებ. აქციას დაგეგმავდა ის, ვისაც სურს სამართლიანობის აღდგენა. მე რამდენჯერაც აქცია დავგეგმე, იმდენჯერ ხან პოლიტიკურ ჭრილში გაატარეს, ხან ისე გაატარეს. აღარ მინდა ჩემს გამო ხალხმა შეურაცხყოფილად იგრძნოს თავი. პარტიებთანაც არასდროს მითანამშრომლია. არასდროს მითქვამს პარტიებისთვის გვერდით დამიდექით-მეთქი. ერთადერთხელ მოვუწოდე და ვითათბირეთ თემაზე, მაგრამ მაინც გვერდზე გავწიე, იქიდან გამომდინარე, რომ ამ საქმეში კონკრეტული პარტიების ჩარევა საჭიროდ არ ჩავთვალე. რაც შეეხება ხალხს, თუ ვინმეს სურს სამართლიანობის აღსადგენად ბრძოლა, გზას არავის ვუკეტავ", - განაცხადა სარალიძემ.
შს მინისტრთან შეხვედრას რაც შეეხება, სარალიძის თქმით, გახარიას იმ შემთხვევაში შეხვდება, როცა მაღალჩინოსანს კალანდიას დაკავების ბრძანება ეჭირება ხელში.

"გიორგი გახარიასთან შეხვედრას არ ვითხოვ. გახარიას, თუ თვითონ უნდა შეხვედრა, ეს არ ვიცი, მაგრამ შევხვდები მხოლოდ იმ შემთხვევაში, როდესაც ბრძანება ეკავება ხელში კალანდიას დაკავების შესახებ. ამ თემასთან დაკავშირებით არავინ ჩამოსულა სამინისტროდან ჩემთან", - აღნიშნა სარალიძემ.

მისივე თქმით, მას არ უთქვამს, რომ შიმშილობას იწყებს.

"მე არც მითქვამს, რომ შიმშილობას ვიწყებ-მეთქი. აქ ისეთი პირობები ნამდვილად არ მაქვს, რომ საჭმელ-სასმელი თავზე მეყაროს... დიაბეტი მაქვს, თუმცა ახლა ჩვეულებრივად ვგრძნობ თავს", - განაცხადა სარალიძემ.