"ბიბლიური თავისუფლება" მღვდელმსახურად კურთხევის კრიტერიუმებს ცვლის

"ბიბლიური თავისუფლება" მღვდელმსახურად კურთხევის კრიტერიუმებს ცვლის - რა შემთხვევაში ეთქმება უარი კანდიდატს

პოლიტიკა - 20:07, 02 Jul, 2018

2000

"ბიბლიური თავისუფლება" იწყებს დაპირებულ რეფორმაციას. ინფორმაცია ამის შესახებ მათ ფეისბუკგვერდზე ვრცელდება

„ჩვენ ბიბლიური თავისუფლების რიგებში მღვდელმსახურებს მივიღებთ 2 კრიტერიუმით:

ა) არაძალადობის პრინციპის აღიარება, არა ფაშიზმს და არა ჰომოფობიას - ანუ ძალადობის დაგმობა, რა ნიშნითაც უნდა ხორციელდებოდეს ის. ამ მოთხოვნის შეუსრულებლობის შემთხვევაში, მღვდელმსახურობის კანდიდატს დაუყონებლივ ეთქმება უარი ეკლესიის წევრობაზე.

ბ) ფაქტობრივი მინიმალური ინფორმაციის ქონა თავისუფლების იდეის რიგ საჭირბოროტო საკითხებზე. ამ თემების შესახებ სახელმძღვანელო მასალა პოსტში ლინკებად არის მოცემული.

2018 წლის 2-9 ივლისს ეკლესიის საეკლესიო კრება არ შეიკრიბება და არ აკურთხებს ახალ მღვდელმსახურებს.

2018 წლის 9 ივლისიდან, ყოველდღე, შაბათ-კვირის გარდა, 13:00-15:00 საათებში ეკლესიის დროებით ოფისში, ირაკლი გამრეკელის 47-ში ჩატარდება მღვდელმსახურობის მსურველებთან გასაუბრება, რის შედეგადაც დადგინდება, აქვს თუ არა მომავალ მღვდელმსახურს საკმარისი წარმოდგენა თავისუფლების იდეასა და გირჩისა და ბიბლიური თავისუფლების საქმიანობაზე. გამოცდის წარმატებით ჩაბარების შემთხვევაში მღვდელმსახურობის მსურველს საკანცელარიო საოპერაციო ხარჯების (20 ლარი) დაფარვის შემდეგ, ადგილზევე გადაეცემა მღვდელმსახურის მოწმობა.

შენიშვნა: თუ მღვდელმსახურობის მსურველი აკმაყოფილებს კრიტერიუმების „ა“ პუნქტში აღნიშნულ მინიმალურ მოთხოვნებს, ანუ არ არის ღიად ფაშისტი და მოძალადე, რაც გაირკვევა მასთან გასაუბრების პერიოდში, მაგრამ „ბ“ პუნქტში აღნიშნულიდან გამომდინარე არც თავისუფლების იდეა აქვს სიღრმისეულად გაცნობიერებული, მას ექნება საშუალება გადაიხადოს თავისუფლების მიზერული ფასი - 100 ლარი და მიიღოს განსხვავებული ფერის საღვთისმსახურო მოწმობა.

ეკლესიის ფინანსური მხარე მთლიანად გამჭვირვალეა საზოგადოებისთვის. ჩვენ პერიოდულად ვაქვეყნებთ ჩვენს ფინანსურ ანგარიშებს. შემოწირულობის 100% ხმარდება მართალი სიტყვის გავრცელებას - ფეისბუქის რეკლამებს.“- ნათქვამია ბიბლიური თავისუფლების მიერ გავრცელებულ მიმართვაში.