"სააკაშვილის წინააღმდეგ დევნაში ჩართულია ყველა, მათ შორის მარგველაშვილი, რომელიც ივანიშვილის დავალებების შემსრულებელია"

"სააკაშვილის წინააღმდეგ დევნაში ჩართულია ყველა, მათ შორის მარგველაშვილი, რომელიც ივანიშვილის დავალებების შემსრულებელია" - ზურაბ მელიქიშვილი

პოლიტიკა - 14:50, 02 Jul, 2018

1431

"ნაციონალური მოძრაობის" ერთ-ერთი ლიდერი ზურაბ მელიქიშვილი საქართველოს პრეზიდენტ, გიორგი მარგველაშვილს მისი წინამორბედის, მიხეილ სააკაშვილის წინააღმდეგ მიმდინარე პოლიტიკური დევნის თანამონაწილეს უწოდებს.

როგორც მელიქიშვილმა "ნიუპოსტს" განუცხადა, მოქმედი პრეზიდენტი, ექსპრემიერის ბიძინა ივანიშვილის პოლიტიკურ დავალებებს ასრულებს.

ენმ-სთვის მიუღებელია პრეზიდენტის ადმინისტრაციის ხელმძღვანელის მიერ სააკაშვილისთვის მოქალქეობის დაბრუნების შესახებ დღეს გაკეთებული განცხადება.

"პრეზიდენტი გიორგი მარგველაშვილი არის მშიშარა და პირდაპირ თუ ირიბად ბიძინა ივანიშვილის დავალებების შემსრულებელია მისი მოღვაწეობის ყველა ეტაპზე. ამის ნათელი დადასტურებაა კახა ბენდუქიძის პოლიტიკური დევნა. დღესაც მარგველაშვილი ამ პასუხით ცდილობს მოიგოს ბიძინა ივანიშვილის გული და მცირე ინდულგენცია მაინც მოიპოვოს, საპრეზიდენტო ვადის ამოწურვის შემდე რომ ის არ დააკავონ.

ხაზგასმით ვამბობ, რომ იმ დევნაში, რომელიც მიხეილ სააკაშვილის წინააღმდეგ ბოლო 6 წლის განმავლობაში ხორციელდება, ყველანი არიან ჩართულნი, მათ შორის მოქმედი პრეზიდენტი"- აღნიშნა ზურაბ მელიქიშვილი.

ცნობისთვის, მიხეილ სააკაშვილმა საქართველოს პრეზიდენტს მიმართა და მოქალაქეობის დაბრუნება მოითხოვა.

სააკაშვილის თქმით, მას ქვეყანაში დაბრუნებისა და არჩევნებში მონაწილეობის უფლება უნდა მიეცეს.

საქართველოს მესამე პრეზიდენტის მოთხოვნას პრეზიდენტის ადმინისტრაციაში უკვე უპასუხეს.

გიორგი აბაშიშვილმა აღნიშნა, რომ "ვისაც მისი მსგავსი ტონის ეშინოდა, ან ეშინია მოქმედ, თუ მის ყოფილ მთავრობაში, შეუძლია ასეთი ტონით მათ მიმართოს და მათგან მოითხოვოს მოქალაქეობის აღდგენა".