"აჩეხილ, აკუწულ ბავშვს მუშტს რომ ურტყამდა, ეს არის გაშველებაო..."- ელენე ხოშტარია

პოლიტიკა - 13:56, 02 Jul, 2018

985

საქართველოს პარლამენტის დროებითი საგამოძიებო კომისიის სხდომაზე „ევროპული საქართველოს“ წევრმა ელენე ხოშტარიამ თქვა, რომ ხორავას ქუჩაზე მომხდარი მკვლელობის საქმეში და შედეგ კომისიაში სამდღიანი დაკითხვებით დაინახა, რომ პროკურატურა არათუ არ ეძებს, არამედ არ ახდენს მტკიცებულებების ამოღებას.

„გამოძიება მიზანმიმართულად შემარცხვენელი ტყუილებით ხსნის, რატომ არ ამოიღო მიმოწერა, რომელიც დაგვეხმარებოდა მოტივის და განზრახვის დადგენაში. გამოძიება ტყუილებს ამბობს, რომ თურმე დ.ღ-ს ტელეფონი იმიტომ არ ამოიღეს, რომ მას ტელეფონი არ ჰქონდა. ორწუთიან ტყუილს ამბობს, იქვე წავუკითხეთ, რომ ტელეფონიც ჰქონდა და თვითონ მიუთითებს ამ ტელეფონზე. ჩვენ ვხედავთ, რომ მტკიცებულებების არმოპოვების პროცესი მიდიოდა რაღაცა მიზნით და აქ არის ეჭვი კონკრეტულად იმ ადამიანის დაძვრენაზე, რომელზეც ჩვენ ვსაუბრობთ...

დიახაც, იმ პირობებში გვიწევს ჩვენ მუშაობა, რომ განადგურებულია მტკიცებულებები და ამ განადგურებული მტკიცებულებების პირობებშიც ჩვენ ვხედავთ, საქმიდან იკვეთება, რომ ეს ადამიანი, მ.კ, საზარელ მკვლელობაში იღებდა მონაწილეობას. როდესაც მივედით პროკურატურის პოზიციის მთავარ წერტილამდე, ვეძახით მას ადვოკატს. ძალიან დიდი იმედი მაქვს, რომ თქვენ არ გახდებით ეს ადვოკატები, მართლა არ ვკარგავ იმედს, რადგან გადის დრო, ეს ყველაფერი რჩება და ხალხი ამას აფასებს. მორალს არ ვკითხულობ, არ შეიძლება, დიდ შეცდომას გადაყვეს უამრავი ადამიანი. მართლა მინდა, ერთობლივად მივიღოთ გადაწყვეტილება, თორემ ამდენი ხანი არც იქნებოდა საჭირო, მივიღებდით, ავწევდით ხელს. აქ ადამიანი ამბობს, რომ აჩეხილ, აკუწულ ბავშვს მუშტს რომ ურტყამდა, ეს არის გაშველებაო. ასეთ მარაზმატიკულ სურათში ვართ და შავით თეთრზე ყველაფერი წერია”, – მიმართა ელენე ხოშტარიამ უმრავლესობის წევრებს.