ეს ყოველივე არ მოხდებოდა აბაშას, რომ პატრონი ყავდეს და დასუფთავების სამსახური კარგად მუშაობდეს. გუშინ სამსახურში მოვდიოდი და იქვე ძაღლების არმია დავინახე, რომლებიც კბილებდაკრეჭილები უყურებდნენ ერთ ქალბატონს რომელსაც ხელში პური ეჭირა და სახლში მიჰქონდა. ქალბატონიც ძაღლების შიშით ვერ ინძრეოდა და ადგილზე იყო გაშეშებული, მოვახერხე და ქალბატონი ძაღლებისგან ვიხსენი, რომელმაც თავისი გასაჭირი გამანდო. ,,ამ მთავრობას რა ვუთხარი მე, როდესაც საპრეზიდენტო არჩევნები მოახლოვდა ყველა აქტიურობს და გაიძახიან ხმა მე მომეციო. ამათი იმედი უნდა მქონდეს მე მომავალში? ელემენტარული მაწანწალა ძაღლების საქმე ვერ მოუგვარებია და ესენი საქართველოს ააშენებენ?! რათ უნდა ამ საქმის მოგვარებას ამდენი ფიქრი? ნუთუ ვერ ხვდებიან თუ დასუფთავების სამსახური კარგად იმუშავებს და ქალაქში ნაგავი აღარ იქნება ძაღლებთან დაკავშირებული პრობლემაც მალე მოგვარდება“.

- ამ პრობლემით თუ მიმართეთ შესაბამის ორგანოებს?

ძალიან ბევრჯერ, მაგრამ შედეგი არ ჩანს, რამოდენიმე თვის წინ გაზეთმა „მომავლის ხმა“–მ გააშუქა ეს პრობლემა, გაშუქებიდან 3-4 დღეში აბაშა და მისი მიმდებარე ტერიტორია სრულიად დასუფთავდა, მაგრამ როგორც კი ამ გაზეთის წარმომადგენლებმა და ჟურნალისტებმა დატოვეს აბაშა ისევ იგივე პრობლემა შეიქმნა. აღარ ვიცით უკვე ვის მივმართოთ, კიდევ ერთხელ მინდა გთხოვოთ ჟურნალისტებს რომ, დაგვეხმაროთ ხმა მივაწვდინოთ იმ ადამიანებს ვისაც ეს საქმე ეხება და იქნებ ასე მაინც მოვაგვაროთ. აღარ შემიძლია რამდენი ხანია შვილიშვილი მთხოვს გარეთ გავუშვა მეგობრებთან მაგრამ არ ვუშვებ რადგან მეშინია რომელიმე ცოფიანმა ძაღლმა, რომ არ უკბინოს“.

მართალია ეს პრობლემა მხოლოდ აბაშას არ აწუხებს მაგრამ აქ მაინც ძალიან მძიმე სიტუაციაა, რომლის მოგვარებას დიდი ფიქრი და დრო არ სჭირდება, მაგრამ როგორც ჩანს შესაბამისი ორგანოები თავს იყრუებენ. როგორც მახსოვს ამ ხელისუფლების დევიზია „საქმე ლაპარაკის ნაცვლად“, მაგრამ ეს სიტყვები აბაშაში უკუღმა ესმით: „ლაპარაკი საქმის ნაცვლად“.

აკაკი წოწონავა