სასჯელაღსრულებისა და პრობაციის სამინისტროს N5 ქალთა პენიტენციურ დაწესებულებაში ამ დროის მონაცემებით, 109 პატიმარი შიმშილობს. ქალი პატიმრები „ადამიანის უფლებათა ცენტრის” და სახალხო დამცველის ანგარიშს აპროტესტებენ, რომლის თანახმად, შემოწმების მიზნით, ქალთა დაწესებულებაში პატიმრების გაშიშვლების მეთოდი ისევ გამოიყენება.

საპარლამენტო უმრავლესობის წევრის, სოფიო კილაძის განცხადებით, პატიმრებს შესაძლებლობა აქვთ სკანერით შემოწმება აირჩიონ:

„შემოწმების დროს პატიმრებს უფლება აქვთ სკანერი აირჩიონ, 99 პროცენტ შემთხვევებში ისინი ირჩევენ სკანერს.

ერთადერთი საგამონაკლისო შემთხვევაა, მაგალითად, როდესაც ონკოლოგიური პაციენტს, მისივე თხოვნით, გინეკოლოგი ამოწმებს. დანარჩენი ეს არის ცრუ ინფორმაცია. სამწუხაროდ, არ ვიცი, რატომ გავრცელდა.

რაც შეეხება ქალების შიმშილობას, ბუნებრივია, მათ ჰქონდათ პროტესტი ასეთი ინფორმაციის გავრცელებაზე და ეს არის ცუდი. ცალსახად არის, რომ იქ შემოწმება მიმდინარეობს ყველა საერთაშორისო სტანდარტის დაცვით, და ამას ადასტურებს თვითონ ქალების რეაქცია, რომ თვითონ შეურაცხყოფილად მიიჩნევენ თავს, როდესაც ასეთი პრაქტიკა არ არის. მათი მხრიდან სავსებით სამართლიანია ეს პროტესტი. არც ერთი საერთაშორისო დასკვნა არ საუბრობს, რომ ასეთი პრაქტიკა არის იქ“, – განაცხადა სოფიო კილაძემ.