ხორავას ქუჩაზე მოზარდების მკვლელობის საქმეზე პარლამენტში შექმნილი დროებითი საგამოძიებო კომისიის თავმჯდომარის, სერგი კაპანაძის განცხადებით, კომისიაში ამ დროისთვის წარმოდგენილი რეკომენდაციები არ იქნება ერთადერთი. ეს განცხადება, კაპანაძემ კომისიისა და არასამთავრობების, ასევე ომბუდსმენის აპარატის წარმომადგენლებთან შეხვედრის შემდეგ გააკეთა. საუბარია ორი რეკომენდაციაზე, რომელიც ეხება ერთის მხრივ ხორავას ქუჩაზე მომხდარის დროს კიდევ ერთი არასრულწლოვანის(გ.მ.) დაჭრის ფაქტზე გამოძიების დაწყებას და მეორე - ერთ-ერთი პირის მიმართ (მ.კ.) სისხლის სამართლებრივი დევნის დაწყების რეკომენდაციას.

ახალგაზრდა იურისტთა ასოციაციის ხელმძღვანელის, სულხან სალაძის თქმით, იდეალური იქნებოდა, რეკომენდაციებთან დაკავშირებით საგამოძიებო კომისიამ გადაწყვეტილება სრული კონსენსუსის შედეგად მიიღოს.

„ვისურვებდი და ალბათ, იდეალური იქნებოდა, კომისიამ გადაწყვეტილება სრული კონსენსუსის შედეგად მიიღოს. იყო ბევრ ვერსიასა და ვარიანტზე საუბარი, რას შეუწყობს ხელს ახლა ამ რეკომენდაციის მიღება ან რა შეიძლება დააზიანოს. იმის გათვალისწინებით, რომ ეს შეხვედრა დახურული იყო, ღიად ამ შესაძლო რისკებზე ან პირიქით უკეთესი სცენარის განვითარებაზე ღიად საუბარს მოვერიდები, მაგრამ ფაქტია, ეს საკითხი განიხილება და იმედს ვიტოვებ, კომისია ოპტიმალურ გადაწყვეტილებას მიიღებს.

მე მოვისმინე როგორც მხარდამჭერი, ასევე უფრო რბილი პოზიცია და ვფიქრობ, ყველა მათგანი უნდა იყოს გაანალიზებული და ამის შემდგომ უნდა იყოს გადაწყვეტილება მიღებული, მით უმეტეს, ის რაც თავიდან ერთგვარი სახით იყო შემოთავაზებული, მაინც რჩება მოცემულობად და ნებისმიერ დროს შეიძლება დადგეს დღის წესრიგში.

ამ ეტაპზე, რთულია პირდაპირ საუბარი. მე არ დავიწყებ საუბარს, რა რისკები შეიძლება ახლდეს, მით უმეტეს, ბევრი, პირი ვინც შეიძლება აქ ფიგურირებდეს, კომისიას ჯერ კიდევ არ გამოუკითხავს“, – განაცხადა სულხან სალაძემ.