"ხელისუფლებას ჩავარდნები არ აქვს" - საკრებულოს სხდომა ხმაურისა და კამათის ფონზე მიმდინარეობდა

პოლიტიკა - 20:10, 29 Jun, 2018

880

საკრებულოს დღევანდელი სხდომა ხმაურის ფონზე მიმდინარეობდა. კამათი მას შემდეგ დაიწყო, რაც ოპოზიციამ ჩაშლილ ტენდერებზე ისაუბრა.

როგორც თბილისის საკრებულოს ფრაქცია „ერთიანი ნაციონალური მოძრაობის“ წევრმა ლევან ხაბეიშვილმა აღნიშნა, ტენდერი ავტობუსების შესყიდვასთან დაკავშირებით ჩაიშალა.

„თქვეს, რომ 25 მილიონ ლარად ჩვენ 100 ავტობუსს ვიყიდითო, შემდეგ ეს ტენდერი ჩავარდა, მერე თქვეს, რომ 100 ვეღარ ვიყიდით, მაგრამ 45 მილიონად 90 შესყიდვას შევძლებთო, ეს ტენდერიც ჩავარდა ორი დღის წინ. ძალიან მარტივი შეკითხვაა, მუდმივად ყველაფერი ჩაუვარდეს დედაქალაქის მთავრობას და უმრავლესობას, მე არ მგონია ნორმალური" - განაცხადა ლევან ხაბეიშვილმა.

თბილისის საკრებულოს ქონების მართვისა და საფინანსო-საბიუჯეტო კომისიის თავმჯდომარე, ირაკლი ზარქუამ ლევან ხაბეიშვილის მიერ გაჟღერებულ ბრალდებებს არ იზიარებს და აღნიშნავს, რომ მმართველ პარტიას ჩავარდნები არ აქვს.

„ჩვენ ვართ პასუხისმგებლიანი მთავრობა, სადაც მცდელობა გვაქვს, რომ მივიღოთ ისეთი პირობები, მათ შორის, ავტობუსებთან დაკავშირებით, სადაც მორგებული იქნება დედაქალაქს" - განაცხადა ირაკლი ზარქუამ.