,,100 ავტობუსს ვიყიდითო ჩავარდა, ღამის ეკონომიკა ჩავარდა, პარკინგების მოწყობის ამბავი ჩავარდა, ზოგადად ,,ჩავარდნა“ გაქვთ ბატონო კახი“

პოლიტიკა - 14:43, 29 Jun, 2018

2687

თბილისისთვის ახალი ავტობუსების შეძენა ვერ ხერხდება. გამომდინარე იქიდან, რომ თბილისის სატრანსპორტო კომპანიის მიერ გამოცხადებულ ტენდერში მონაწილე ერთადერთი კომპანია - „თეგეტა თრაქ ენდ ბასი“ ტექნიკური ხარვეზების გამო დისკვალიფიცირდა, ერიას ახალი ავტობუსების შესყიდვაზე ტენდერის გამოცხადება კიდევ ერთხელ მოუწევს. მუნიციპალური მომსახურებისათვის საჭირო საზოგადოებრივი ავტობუსების სახელმწიფო შესყიდვაზე ელექტრონული ტენდერი, აუქციონის გარეშე თავიდან 2018 წლის 24 მაისს გამოაცხადა. წინადადებების მიღება 2 ივნისს დაიწყო და 5 ივნისს დასრულდა.

მერია 90 ავტობუსის შესყიდვას 45 მილიონ ლარად გეგმავდა. შეთავაზების ფასის კლების ბიჯი 180 ათასი ლარი იყო. გარანტიის ოდენობა 45 000 ლარი, ხოლო ვადა 160 დღე.

მერიაში ახალი ავტობუსების შესყიდვისთვის გამოცხადებული ტენდერის ჩავარდნას ეხმაურება ,,ნაციონალური მოძრაობის“ საკრებულოს წევრი ლევან ხაბეიშვილი.

„თბილისის მერმა 45 მილიონად 100 ავტობუსს ვიყიდითო და ეგ ტენდერი ჩავარდა. მერე თქვეს, რომ 45 მილიონად 100 ვეღარო, მაგრამ 90 ავტობუსს ვიყიდითო და ესეც ჩაუვარდათ.

ღამის ეკონომიკა ჩავარდა, პარკინგების მოწყობის ამბავი ჩავარდა და ზოგადად მგონი "ჩავარდნა" გაქვთ ბატონო კახი“ - წერს ხაბეიშვილი ფეისბუქის გვერდზე.