"მოთმინება, იყავით ჩუმად, როცა კითხვას არ გისვამენ"- შელაპარაკება გიგა ბოკერიასა და ზვიად ფხაკაძეს შორის

პოლიტიკა - 13:30, 25 Jun, 2018

3871

დროებითი საგამოძიებო კომისიის სხდომაზე გიგა ბოკერიასა და ზვიად ფხაკაძეს შორის შელაპარაკება მოხდა.

ბოკერიამ ფხაკაძეს მოუწოდა კამათსა და პოლიტიკურ დებატებში არ შევიდეს და მხოლოდ კომისიის წევრების კითხვებს გასცეს პასუხი.

ბოკერიამ თქვა, რომ უკმაყოფილების შემთხვევაში, ფხაკაძეს შეუძლია ბრიფინგი ჩაატაროს და საკუთარი მოსაზრება იქ დააფიქსიროს.

„მოთმინება, აქ თქვენ ხართ დაკითხვაზე. ვინც კითხვას გისვამთ ის უნდა დააკმაყოფილოთ ან არ დააკმაყოფილოთ. თუ თქვენ უკმარისობის გრძნობა გექნებათ, გაქვთ მერე ბრიფინგის ჩატარების საშუალებაც. აქ პოლიტიკურ დებატებში შესვლა და შეფასება როგორ იმუშავეთ,…ნუ მაწყვეტინებთ, მოთმინებამეთქი თუ შეიძლება. ვერ მისმენთ, ვერ იკავებთ თავს და პატივი ეცით კომისიას“- აღნიშნა დეპუტატმა.

თავის მხრივ "ქართული ოცნების" წარმომადგენლებმა ბოკერიას უსაყვედურეს, რომ "ის მათ ეჩხუბებოდა".

რაზეც "ევროპული საქართველოს" ლიდერმა კოლეგებს მოუწოდა თავიანთი გამოსვლისას ისაუბრონ საკუთარი შეხედულებისამებრ.

„სამუშაო რეჟიმი გულისხმობს, რომ თქვენ გისვამენ კონკრეტულ კითხვას, თქვენ პასუხობთ - კი ან არა. მერე ვინც კითხვა დაგისვათ, იმის საქმეა თავისვე დროის ლიმიტში შემდეგ კითხვაზე გადავა თუ არა. საზოგადოება განგვსჯის, დამაჯერებელია თუ არა პასუხი, რომ კამერას სანამ ამოვიღებდით და ვნახავდით, რა ვიცოდით ზედ რა იყოო, ეს რამდენად დამაჯერებელია მერე ვნახავთ... აქ ნუ გვითრევთ პოლიტიკურ დებატებში. თქვენი შეფასებები და მორალის კითხვა რას მოიტანდა, არ გვაინტერესებს ჩვენ. გაეცით პასუხი კითხვებზე და მერე თუ დაგრჩებათ უკმარისობის გრძნობა, არავინ ზღუდავს თქვენი სიტყვის თავისუფლებას ამ კომისიის გარეთ ან სხვა კომისიის წევრებისთვის კითხვებზე პასუხების გაცემისას. გასაგებია თქვენთვის? იყავით ჩუმად, როცა არ გისვამენ კითხვას“, – მიმართა ბოკერიამ პროკურორ ზვიად ფხაკაძეს.