სამთავრობო ცვლილებებთან დაკავშირებული კონსულტაციების მესამე რაუნდი "ქართული ოცნების" ოფისში გვიან ღამით დასრულდა. გია ვოლსკის განცხადებით, კონსულტაციები აღარ გაგრძელდება და უახლოეს მომავალში პრემიერი წარმოადგენს ცვლილებების მომზადებულ ვერსიას.

მისი თქმით, რამდენიმე სამინისტროსთან დაკავშირებით გადაწყვეტილება უკვე მიღებულია. კონკრეტულ გვარები კი - თუ ვინ დატოვებს მინისტრის თანამდებობას, ჯერ ისევ უცნობი რჩება.

"მთავარი აქცენტები გაკეთებული იყო თვითონ შედეგებზე, თუ რა ეფექტი ამას ექნება როგორც ორგანიზაციული, ასევე ფინანსური თვალსაზრისით"- აცხადებს გია ვოლსკი.

პარლამენტის თავმჯდომარის ირაკლი კობახიძის თქმით, საკანონმდებლო ორგანო პირველ ეტაპზე რეორგანიზაციის გეგმას უყრის კენჭს.

"ჯერჯერობით გვქონდა საუბარი რეორგანიზაციაზე, ამაზე გრძელდება მსჯელობა უახლოეს დღეებში წარმოადგენს უკვე ამ დისკუსიების საფუძველზე პრემიერ-მინისტრი რეორგანიზაციის ვარიანტს და ამას ეყრება კენჭის აქართველოს პარლამენტში და ამის შემდეგ უკვე გაგრძელდება დისკუსია მთავრობის პერსონალურ შემადგენლობასთან დაკავშირებით,"-აცხადებს ირაკლი კობახიძე.

პარლამენტის ფრაქცია ”ქართული ოცნება - მწვანეების” თავმჯდომარე გიორგი გაჩეჩილაძე კი აცხადებს, რომ კონსულტაციების შედეგად სახელმწიფო მდივნის პოსტის შემოღება აღარ განიხილება.

"სახელმწიფო მდივნის ინსტიტუტი აღარ იქნება, იყო ადრე ამაზე საუბარი, მაგრამ აღარ იქნება. გადაწყვეტილება არის მიღებული, რომ იმ სამინისტროებში, რომლებიც ერთიანდებიან და უკვე გაერთიანებულია, კონკრეტულ დარგებს ეყოლებათ თავისი მოადგილეები კურაციის ქვეშ," - აცხადებს გიორგი გაჩეჩილაძე.