წულუკიანის უწყება მუხთარლის გატაცების საქმეზე მიღებულ შეკითხვებს რამდენიმე კვირაში უპასუხებს

პოლიტიკა - 14:52, 23 Jun, 2018

1029

თეა წულუკიანის თქმით, იუსტიციის სამინისტრო ევროპის ადამიანის უფლებათა სასამართლოდან აზერბაიჯანელი ჟურნალისტის, აფგან მუხთარლის, გატაცების საქმეზე მიღებულ შეკითხვებს რამდენიმე კვირაში უპასუხებს.

„მედიით გავიგეთ ყველამ, მთელმა საზოგადოებამ, რომ ბატონმა მუხთარლიმ საქართველოსა და აზერბაიჯანს ევროპულ სასამართლოში უჩივლა, რამდენიმე დღის წინ ჩვენ მივიღეთ კითხვარი და ფაქტები ევროპული სასამარლოსგან. ჩვენ გვაქვს რამდენიმე კვირა მოცემული, რომ ამ კითხვაზე პასუხები შევადგინოთ. იუსტიციის სამინისტრო წარმოადგენს სახელმწიფო სტრუქტურებს სტრასბურგის სასამართლოს წინაშე, ამიტომ ამ კითხვებზე პასუხების გასაცემად, როგორც წესი და რიგია, ჩვენ გამოვითხოვთ სხვადასხვა უწყებიდან ინფორმაციას იმისთვის, რომ პოზიცია შემუშავდეს და ერთიანი დოკუმენტი ვადაში გადაიგზავნოს ევროპული სასამართლოს წინაშე,“ - განაცხადა თეა წულუკიანმა.

ევროსასამართლო გატაცებული აზერბაიჯანელი ჟურნალისტის საქმეზე საქართველოს რვა კითხვას, აზერბაიჯანს კი 6 მწვავე კითხვას უგზავნის.

მუხთარლის ადვოკატი ამბობს, რომ ქვეყნებს სასამართლოსთვის პასუხების გასაცემად ვადა 31 ივლისამდე განესაზღვრათ. მისივე განმარტებით, ქვეყნებს სასამართლოს კითხვებზე პასუხების გაცემის ვალდებულება აქვთ.