დისციპლინური სამართალწარმოების საკითხები - რა საკითხებს განიხილავენ წულუკიანი და კობახიძე სასამართლო რეფორმის სამუშაო ჯგუფის შეხვედრაზე

პოლიტიკა - 13:22, 23 Jun, 2018

1210

სასამართლო რეფორმის სამუშაო ჯგუფის შეხვედრაზე მოსამართლეთა დისციპლინური პასუხისმგებლობისა და საქართველოს იუსტიციის უმაღლესი საბჭოს დამოუკიდებელი ინსპექტორის სამსახურის მიმართულებით, სასამართლო სისტემაში დაგეგმილ რეფორმაზე მსჯელობენ.
სასტუმრო რედისონში მიმდინარე შეხვედრას შეხვედრას პარლამენტის თავმჯდომარე, უზენაესი სასამართლოს და იუსტიციის უმაღლესისაბჭოს თავმჯდომარე ნინო გვენეტაძე, დეპუტატები, საბჭოს წევრები და საერთაშორისო ორგანიზაციების წარმომადგენლები ესწრებიან.
საქართველოს პარლამენტის თავმჯდომარის განცხადებით, სასურველია, დღეს გამართულ შეხვედრაზე მოსამართლეთა დისციპლინური პასუხისმგებლობის საკითხებთან დაკავშირებით, დისკუსია ამოიწუროს. მისივე თქმით, მომზადებულ კანონპროექტში ასახულია წინა შეხვედრებზე გამოთქმული რეკომენდაციები.
„ჩვენ გვქონდა საინტერესო დისკუსიები შესაბამის კანონპროექტზე და დღეს, იმედი მაქვს, რომ ამ თემასთან დაკავშირებით, დისკუსიებს დავასრულებთ. განსახილველი გვაქვს კიდევ სხვა თემები: სკოლის თემა, საბჭოს თემა. უნდა გადავიდეთ ამ თემების განხილვაზე, აქედან გამომდინარე, სასურველია, რომ დღეს ამოვწუროთ დისკუსია დისციპლინურ საკითხებთან დაკავშირებით. ჩვენ დაგიგზავნეთ კანონპროექტი, რომელიც გადამუშავდა წინა შეხვედრაზე გამოთქმული რეკომენდაციების შესაბამისად. ამ კანონპროექტში არის ასახული ის საკითხები, რომლებზეც მეტ-ნაკლებად შეჯერდა პოზიციები წინა შეხვედრაზე”,- აღნიშნა ირაკლი კობახიძემ.

საქართველოს იუსტიციის უმაღლესი საბჭოს წევრის, ნაზი ჯანეზაშვილის, თქმით, ერთ-ერთი კანონპროექტი, რომელსაც დღეს განიხილავენ, იუსტიციის უმაღლესი საბჭოს სხდომაზე განხილული არ ყოფილა.

ნაზი ჯანეზაშვილის განმარტებით, აღნიშნული კანონპროექტი საშუალებას იძლევა, რომ დაიწყოს დისციპლინური სამართალწარმოების პროცედურები იუსტიციის საბჭოს არამოსამართლე წევრების მიმართ მათი მხრიდან გადაცდომების შემთხვევაში.

„ეს არის დრაკონული კანონი, ვინაიდან მათ ექმნებათ დისკომფორტი, მათ ექმნებათ საფრთხეები, როდესაც საჯაროდ გამოგაქვს ყველა ინფორმაცია, რაც საბჭოში ხდება და ამის საპასუხოდ მათ შემოიტანეს ასეთი წინადადება, რომელიც თავისთავში გულისხმობს იმას, რომ საბოლოოდ შესაძლებელია, დადგეს ისეთი შედეგი, რომ გამოიწვიოს არამოსამართლე წევრის გათავისუფლება თანამდებობიდან,“ - განაცხადა ჯანეზაშვილმა.

საქართველოს იუსტიციის უმაღლესი საბჭოს მდივანი, გიორგი მიქაუტაძე, აცხადებს, რომ დისციპლინური პასუხისმგებლობის საფუძვლები და შესაბამისად, პროცედურები დაიხვეწება.