11 სამინისტრო და დარგის მენეჯერები - პრემიერი დღეს უმრავლესობას შეხვდება

პოლიტიკა - 09:50, 23 Jun, 2018

1658

ქართული ოცნების ოფისში გვიან ღამამდე მსჯელობდნენ მინისტრთა ახალი კაბინეტისა და სტრუქტურული ცვლილებების შესახებ. როგორც ჟურნალისტებთან სხდომის დასრულების შემდეგ საპარლამენტო უმრავლესობის ერთ-ერთმა ლიდერმა, მამუკა მდინარაძემ განაცხადა სავარაუდოდ 11 სამინისტროზე მოხდება შეჯერება, ხოლო სტრურტურული ცვლილებები საბოლოოდ დღეს დასრულდება. მისი თქმით, დღეს პრემიერ-მინისტრი უმრავლესობას შეხვდება, ხოლო სამინისტროების რესტრუქტურიზაციის დასრულების შემდეგ, დაიწყება საუბარი პერსონებზე.

რაც შეეხება მთავრობაში ახალ თანამდებობას, სახელმწიფო მდივანს, მდინარაძე ამბობს , სახელმწიფო მდივანი არაფერ შუაშია. თითოეულ დარგს უხელმძღვანელებს კონკრეტული ადამიანი.

,,ძალიან ბევრი იდეა გახმოვანდა ამ შეხვედრებისას და არც ერთი ფუნქციური დამატება არ განიხილება. საუბარია დარგის მენეჯერებზე, ხელმძღვანელებზე, რომლის მოვალეობასაც ახლა ასრულებენ მოადგილეები", - განაცხადა მამუკა მდინარაძემ.

ქართული ოცნების დეპუტატი რომან კაკულია ამბობს, რომ სახელმწიფო მდივანთან დაკავშირებით გავრცელებული ინფორმაციები გაზვიადებული და არასწორია.

„სახელმწიფო მდივანთან დაკავშირებით გაზვიადებული და არასწორი ინფორმაციები ვრცელდება, განსაკუთრებული არაფერი იგეგმება. მინისტრის მოადგილეები შეასრულებენ სხვადასხვა მიმართულებებით თავიანთ ფუნქციას, ხოლო სამინისტროების ფუნქციაში განსაკუთრებული, თვისობრივად ახალი ცვლილებები არ იგეგმება. ეს ყველაფერი ინტერპრეტაციებია, ერთის ნათქვამი და მეორის დამატებული“, – აღნიშნა რომან კაკულიამ.

დღეს უმრავლესობის და პრემიერის შეხვედრა 19:00 საათზე გაიმართება.