მოზარდების მკვლელობის საქმე - საპარლამენტო საგამოძიებო კომისია დღეს მოკლული მოზარდების მშობლებს მოუსმენს

პოლიტიკა - 09:34, 22 Jun, 2018

903

მოზარდების მკვლელობის საქმის შემსწავლელი დროებითი საპარლამენტო საგამოძიებო კომისია დღეს მოკლული მოზარდების მშობლებს მოუსმენს.

სხდომას, ზაზა სარალიძეს და დავით დადუნაშვილიც დაესწრებიან.

დროებით საგამოძიებო კომისიაში გადაგზავნილია საქმის მასალები, როგორც სასამართლოდან, ასევე შინაგან საქმეთა სამინისტროდან.

„ეს კომისია მათ შორის იმის გამო შეიქმნა, რომ ამ ოჯახებმა, ზაზა სარალიძემპირველ რიგში, ეს საკითხი გამოიტანა საზოგადოების განსასჯელად და საზოგადოების წნეხის შედეგად შეიქმნა ეს კომისია.

ჩვენ ვიწყებთ მათთან შეხვედრებით, თუმცა შემდეგ ეტაპზე რა თქმა უნდა გვექნება შეხვედრები სამართალდამცავი ორგანოების წარმომადგენლებთან. როგორც შსს-დან ისე პროკურატურიდან,“-განაცხადა სერგი კაპანაძემ.

უახლოეს მომავალში იგეგმება, პროკურორებისა და მოწმეების, მათ შორის ყოფილი მთავარი პროკურორის ირაკლი შოთაძის, ასევე იუსტიციისა და შინაგან საქმეთა მინისტრების გამოკითხვა.

„საქმის გაცნობა დავიწყეთ, თუმცა პარალელურ რეჟიმში გაგრძელდება დაკითხვები. გეგმაში არის, რომ ყველა იმ პირს მოვუსმინოთ ვინც იყო მონაწილე ამ კონფლიქტის და ვინც არ იყო მონაწილე, მაგრამ შეესწრო ამ ფაქტს ან ინფორმაციის მატარებელია. მცირე ჯგუფები შეიქმნება, რომელიც პენიტენციურ დაწესებულებაში შევა და პატიმრობაში მყოფ პირებსაც გაესაუბრება,“-განაცხადა ეკა ბესელიამ.

სხდომა 10:00 საათზე დაიწყება.