ხმაური კომპანია "სვეტის" სათაო ოფისში - შენობა დაზარალებულმა მენაშენეებმა დაიკავეს

პოლიტიკა - 18:30, 21 Jun, 2018

1615

დეველოპერული კომპანია „სვეტის“ სათაო ოფისი, დაზარალებულმა მენაშენეებმა დაიკავეს და შიმშილობა გამოაცხადეს. მათი თქმით, ისინი შენობას არ დატოვებენ მანამ, სანამ მათი პრობლემა არ მოგვარდება. დაზარალებულების ბინები, ჯერჯერობით, კვლავაც დაუსრულებელია. მენაშენეები ამტკიცებენ, რომ მათ მიერ გადახდილი ერთ მილიონ ლარზე მეტი კომპანიის მენეჯმენტმა გაფლანგა და ისინი უბინაოდ დატოვა. აქციის მონაწილეები ითხოვენ, რომ მათ პასუხისმგებელი პირები შეხვდნენ და ხელისუფლებამ მათი პრობლემა მოაგვაროს, მათ შორის, თბილისის მერმა, კახა კალაძემ. დაზარალებულები გამოძიების დაწყებას პროკურატურისგან მოითხოვენ.

კომპანია "სვეტის" დირექტორი, თორნიკე ჯანელიძის თქმით უცხოელ პარტნიორებთან აქტიური შეხვედრების შემდეგ, სამშენებლო სამუშაოები ყველა შეჩერებულ ობიექტზე განახლდება.

„ამ წუთასაც ჩვენს უცხოელ პარტნიორებთან ერთად გვაქვს აქტიური შეხვედრები, გავდივართ სწორედ სვეტის საკითხებს, რომ ყველა ეს საკითხი, რომელიც აინტერესებს ჩვენს მომხმარებლებს, ნაწილობრივ დაზარალებულ ადამიანებს იქნას დროულად გადაწყვეტილი და განახლდეს ჩვეული რეჟიმის სამშენებლო სამუშაოები" - განაცხადა „სვეტის“ დირექტორმა.

თორნიკე ჯანელიძემ ჩაბარების ვადების გადაცილება პროექტების მასშტაბურობასდაუკავშირა. მაისში დასასრულებელი პროექტების დასრულების ზუსტ თარიღს ვერ ასახელებს, მაგრამ მენაშენეებს ივნისის ბოლოდან ეტაპობრივ განახლებულ სამშენებლო სამუშაოებს ჰპირდება.