სკანდალი პრემიერობის კანდიდატის ირგვლივ - "საერთაშორისო გამჭვირვალობა" აუდიტის სამსახურს ბახტაძის მიერ შესაძლო ადმინისტრაციული კანონდარღვევის შესწავლას სთხოვს

პოლიტიკა - 09:56, 21 Jun, 2018

1304

„საერთაშორისო გამჭვირვალობა - საქართველო“ სახელმწიფო აუდიტის სამსახურს მოუწოდებს, პრემიერ-მინისტრობის კანდიდატის, მამუკა ბახტაძის განცხადებით დაინტერესდეს.

საქმე ეხება 2012 წლის აგვისტოში „ერთიანი ნაციონალური მოძრაობის“ სასარგებლოდ შეწირულ 20 000 ლარს.
ბახტაძე ირწუნება, რომ საკუთარი არ იყო და მისი საბანკო ანგარიში „იქნა გამოყენებული მხოლოდ ტექნიკურად“.
მესამე სექტორში აღნიშნავენ, რომ საქართველოს კანონმდებლობის შესაბამისად, შემოწირულების სხვა პირის მეშვეობით განხორციელება აკრძალულია და ეს ქმედება იწვევს აკრძალული შემოწირულების განმახორციელებელი პირის დაჯარიმებას შენატანის ორმაგი ოდენობით, თუმცა, ვინაიდან ამ ტიპის დარღვევებზე 2012 წლის 12 დეკემბერს მიღებულ იქნა ადმინისტრაციული სახდელისაგან გათავისუფლების შესახებ აქტი, დამრღვევის მიმართ სანქცია ვეღარ იქნება გამოყენებული.
„მიუხედავად ამისა, აღნიშნული შემთხვევის სრულყოფილი შესწავლა უაღრესად მნიშვნელოვანია, ვინაიდან საქმე ეხება ქვეყნის უმაღლესი პოლიტიკური თანამდებობის მსურველ კანდიდატს, რომელსაც კარგი საჯარო მმართველობის უზრუნველყოფის საკითხში მთავარი როლი აკისრია. საქართველოს პრემიერ-მინისტრობის კანდიდატმა კიდევ ერთხელ უნდა განმარტოს, რა სახით მონაწილეობდა „ერთიანი ნაციონალური მოძრაობის” სასარგებლოდ შემოწირულობის განხორციელებაში. აუცილებელია, გაირკვეს, იყო თუ არა იგი ჩართული კანონსაწინააღმდეგო ქმედებებში. მიუხედავად იმისა, რომ აღნიშნული მუხლი ამნისტირებულია და სანქცია ვერ იქნება გამოყენებული, „საერთაშორისო გამჭვირვალობა - საქართველო“ ამ შემთხვევის შესასწავლად მაინც მიმართავს სახელმწიფო აუდიტის სამსახურს, რათა დადგინდეს სიმართლე ამ საქმეზე. ცნობისათვის 2013 წელს მსგავსი პრაქტიკა სახელმწიფო აუდიტის სამსახურს უკვე ჰქონდა, როდესაც მან ამნისტირებულ დარღვევაზე მაინც იმსჯელა და დაადგინა სამართალდარღვევის ფაქტი მიუხედავად იმისა, რომ სანქცია ვერ დააწესა“, - ნათქვამია განცხადებაში.