საქართველოს იუსტიციის მინისტრობის კანდიდატი თეა წულუკიანი აცხადებს, რომ მისი უწყება მზად არის განახლდეს ვანო მერაბიშვილის საკნიდან გაყვანის საქმის გამოძიება:

„სამოქმედო გეგმა წარდგენილია მინისტრთა კომიტეტში და ჩვენ, რა თქმა უნდა, მზად ვართ, რომ ვანო მერაბიშვილის საკნიდან გაყვანის ეპიზოდზე, რომელიც, როგორც სტრასბურგის სასამართლომ თქვა, არავითარ გავლენას არ ახდენს პატიმრობის კანონიერებაზე, განვაახლოთ გამოძიება და კიდევ ერთხელ მოვუსმინოთ მოწმეებს და ვნახოთ ახალი მტკიცებულებები, თუკი ასეთი რამ იქნება“, - განაცხადა იუსტიციის მინისტრობის კანდიდატმა თეა წულუკიანმა დეპუტატების შეკითხვების პასუხად.

თეა წულუკიანის თქმით, სტრასბურგის სასამართლოს დიდი პალატის გადაწყვეტილებით, ვანო მერაბიშვილის მიმართ არ დარღვეულა ევროკონვენციის მე-18 მუხლი:

„სწორედ მე-18 მუხლის ეს ნაწილი იყო ყველაზე მნიშვნელოვანი და ამით დამთავრდა დისკუსია იმ თემაზე, არის თუ არა ვანო მერაბიშვილი პოლიტიკური პატიმარი. პასუხია, რომ არ არის!“ - განაცხადა თეა წულუკიანმა.