საქართველოს უმაღლესმა საკანონმდებლო ორგანომ დღეს დროებითი მთავრობა უნდა დაამტკიცოს. პრემიერ-მინისტრობის კანდიდატს მამუკა ბახტაძეს „ერთიანი ნაციონალური მოძრაობის“ რიგებში აკრიტიკებენ. რომან გოცირიძის განცხადებით, მთავრობა სოციალისტური იდეებით არის წარმოდგენილი:

„გვეყოლება ახალგაზრდა პრემიერ-მინისტრი ძველმოდური იდეებით. ის პროგრამა ეკონომიკური, რომელიც მან გაგვაცნო, ეს არის უკანგადადგმული ნაბიჯი და უკანდახევა იმ პრინციპებიდან, რომელიც შეიქმნა საქართველოში ვარდების რევოლუციის შემდეგ და რომელმაც საქართველოს ეკონომიკა დააყენა ფეხზე. ექვსი წლის განმავლობაში ხდებოდა რევიზია ამ მოდელისა და ბოლო წერტილი თავისი იდეებით დაუსვა ახალმა პრემიერ-მინისტრმა და ახალი მთავრობა იქნება სოციალისტური იდეების მატარებელი, რომელიც კიდევ უფრო გააღრმავებს პრობლემებს ეკონომიკაში,“- განაცხადა პარლამენტის ფრაქცია ”ნაციონალური მოძრაობის” თავმჯდომარემ, რომან გოცირიძემ.