ჟენევაში მოლაპარაკებების მორიგ რაუნდზე რუსეთთან არჩილ ტატუნაშვილის ორგანოების გადმოცემის საკითხზე ისაუბრებენ

პოლიტიკა - 21:04, 19 Jun, 2018

1100

ჟენევაში დღეს საერთაშორისო მოლაპარაკებების 44–ე რაუნდი დაიწყო. საგარეო საქმეთა მინისტრის მოადგილის დავით დონდუას თქმით, უკვე გაიმართა შეხვედრები მოლაპარაკებების თანათავმჯდომარეებთან და თანამოდერატორებთან, რომელთაც პოზიციები გააცნეს. დონდუას თქმით ჟენევის მოლაპარაკებების დროს რუსულ მხარესთან განსახილველი ერთ-ერთი საკითხი არჩილ ტატუნაშვილის ორგანოების გადმოცემა იქნება.

„რუსულ მხარესთან ხვალ გვექნება საუბარი არჩილ ტატუნაშვილის ორგანოების გადმოცემის შესახებ. ყველა ფარგლებს სცდება არჩილ ტატუნაშვილის უკანონო დაკავება, მისი ტყვეობაში ყოფნა, წამება, სიკვდილი, ერთი თვე გვამის არ გადმოცემა და ერთი თვის შემდეგ გვამის ამ სახით გადმოცემა. წინა შეხვედრაზე რუსეთს არაფერი ჰქონდა სათქმელი და სულ ოსებისკენ იყურებოდნენ. რუსული დელეგაცია ისე იქცეოდა, რომ ამ საქმესთან არაფერი ესაქმებოდათ და თუ რამე მოხდა, მაშინ ცხინვალის ე.წ. მთავრობამ უნდა ისაუბროს. რუსეთი ვერ გაექცევა პოლიტიკურ პასუხისმგებლობას“, – განაცხადა დავით დონდუამ, მისი თქმით, საქმე ბოლომდე მიყვანილი არ არის და დამნაშავეები ისევ არ დასჯილან.

ჩვენ ყველაფერს გავაკეთებთ აქ და ყველა ფორმატში, რომ ვინც დასასჯელია, დაისაჯოს, დამნაშავეები წარდგნენ მართლმსაჯულების წინაშე და ყველა კითხვას პასუხი გაეცეს. ერთი რამ უკვე ცხადია, მომხდარზე პოლიტიკური ვალდებულება ეკისრება ძალას, რომელიც ეფექტიან კონტროლს ახორციელებს ოკუპირებულ ტერიტორიებზე. ეს ძალა არის რუსეთის ფედერაცია. წინა რაუნდზეც გვქონდა ამ თემაზე ცხარე საუბარი. სამწუხაროდ, დიდი პროგრესი ამ მიმართულებით არ არის. დამნაშავეები ისევ დაუსჯელები არიან და ამჯერადაც ამაზე გვექნება საუბარი.“- განაცხადა დონდუამ.

მინისტრის მოადგილის თქმით, ჟენევის ფორმატზე უკეთესი ფორმატის შექმნა შეუძლებელია, მთავარი პრობლემა არის ის, რომ რუსეთს არ აქვს პოლიტიკური ნება, რომ წარიმართოს შედეგზე ორიენტირებული მსჯელობა:

ამ ფორმატში ჩართულია ყველა საერთაშორისო აქტორი, რომელსაც რაიმე ეთქმის კონფლიქტის მოგვარების საქმეში. ამაზე უკეთეს ფორმატს ვერ შევქმნით. პრობლემა არის ის, რომ ვერ იძლევა იმ შედეგს, რომელიც ჩვენ და საერთაშორისო ორგანიზაციებს გვსურს. ამ მოლაპარაკების მონაწილე რუსეთს არ აქვს პოლიტიკური ნება, რომ წარიმართოს შედეგზე ორიენტირებული მსჯელობა და მივიღოთ კონკრეტული გადაწყვეტილებები.“- განაცხადა დონდუამ პირველ არხთან.