უკრაინის ავტოკეფალიის საკითხზე მსოფლიო საპატრიარქოს დელეგაცია ილია მეორეს ხვდება

პოლიტიკა - 14:20, 16 Jun, 2018

1449

მსოფლიო საპატრიარქოს დელეგაციის წევრები საქართველოს კათოლიკოს-პატრიარქს ხვდებიან. შეხვედრის მთავარი თემა უკრაინის საეკლესიო პრობლემებია, როგორც ცნობილია უკრაინა მსოფლიო საპატრიარქოსგან ითხოვს, რომ უკრაინის მართლმადიდებელ ეკლესიას ავტოკეფალია მიანიჭოს. ცნობისთვის, უკრაინის ეკლესია კონსტანტინოპოლის ეკლესიის დაქვემდებარებაში იყო 998 წლიდან 1686 წლამდე, 1686 წელს კი კიევის მიტროპოლია მოსკოვის საპატრიარქოს შეუერთდა.

მსოფლიო საპარტრიარქოს დელეგაციის წევრები ილია მეორეს მსოფლიო პატრიარქის პოზიციას გააცნობენ. ამავე საკითზე მოლაპარაკება საპატრიარქოსი გამართა, რუსული ეკლესიის დელეგაციამაც, რომელიც უკრაინის ავტოკეფალიის წინააღმდეგია.

პროტოპრესვიტერ გიორგი ზვიადაძის თქმით, უკრაინაში განვითარებულ მოვლენებთან დაკავშირებით საქართველოს საპატრიარქოს პოზიცია სინოდის მომდევნო სხდომის დასრულების შემდეგ გახდება ცნობილი.

მიმდინარე წლის აპრილის თვეში, უკრაინის რადას დეპუტატებმა მხარი დაუჭირეს უკრაინის პრეზიდენტის მიმართვას მსოფლიო პატრიარქ ბართლომესადმი, რათა პატრიარქმა გამოსცეს ტომოსი უკრაინის მართლმადიდებელი ეკლესიის ავტოკეფალიასთან დაკავშირებით.

თეოლოგების აზრით, ამ საკითხის სწრაფად გადაჭრას ხელს ის ფაქტორი უშლის, რომ საეკლესიო კანონმდებლობით ავტოკეფალიის მინიჭების უფლება დედაეკლესიას აქვს, ხოლო უკრაინის შემთხვევაში, სადაც ეკლესია ავტონომიურია, რუსეთიც და კონსტანტინოპოლიც თავს დედა-ეკლესიებად მიიჩნევენ და თუკი ერთი ეკლესია მეორესთან შეთანხმების გარეშე გადაწყვეტს უკრაინის საკითხს, ეს დიდ განხეთქილებას გამოიწვევს, რაც არავის ინტერესში არ შედის და ამიტომაც ეს საკითხი შესაძლოა გაიწელოს.