უმრავლესობის ერთ-ერთი წევრი, პარლამენტის ვიცე-სპიკერი გიორგი ვოლსკი პრემიერ-მინისტრის გადადგომას ეხმაურება. მისი თქმით, გიორგი კვირიკაშვილის გადაწყვეტილება მისთვის მოულოდნელი აღმოჩნდა და დღევანდელ ბრიფინგზე პრემიერისგან სამოქმედო გეგმას ელოდა.

„როგორც ჩანს ბატონმა გიორგიმ გადაწყვიტა, რომ ამ თემებთან დაკავშირებით, რაც შეეხება იმ ნაწილს რაზეც გუნდშიც გამოითქვა აზრი და პარტიის თავმჯდომარე ახსენა მან და მისი მხრიდანაც გამოითქვა გარკვეული მოსაზრებები, შენიშვნები, ველოდებოდით განცხადებებსა ამასთან დაკავშირებით, ანგარიშს ველოდებოდით ვფიქრობ, პრემიერმა მიიღო წინასწარი გადაწყვეტილება, რომ სჯობს წავიდეს. ეს მისი გადაწყვეტილება იყო.

მართალი გითხრათ, მე ველოდებოდი ჯერ იმ ანგარიშს, რომელზეც დილით ვსაუბრობდი.

შემცვლელთან დაკავშირებით ჩვენ არ გვისაუბრია. ცვლილებებზე ასე სწრაფად ნუ ვილაპარაკებთ, ჩვენს ქვეყანას სტრესები არ სჭირდება.

ერთიც მინდა ვთქვა, დღეს უკვე არავის უკვირს, თუ რატომ გაგრძელდა სამ საათზე მეტი ეს საუბარი და გუშინ ამაზე თავის მართლება მოგვიწია. სერიოზული საუბარი იყო, სერიოზული განსჯა იყო. ვფიქრობ, პრემიერმა მიიღო ის გადაწყვეტილება, რომელიც მას მიაჩნია პიროვნულად სწორად ამ ვითარებაში. თუმცა მე ამ გადაწყვეტილებას ახლა არ ველოდებოდი “-აცხადებს გია ვოლსკი.