"ის დროა, ივანიშვილს და მისი გუნდს ეყოს გამბედაობა და აღიაროს ამ ხელისუფლების დასასრული"

"ის დროა, ივანიშვილს და მისი გუნდს ეყოს გამბედაობა და აღიაროს ამ ხელისუფლების დასასრული" - ნინო ბურჯანაძე

პოლიტიკა - 16:34, 13 Jun, 2018

1957

„დემოკრატიული მოძრაობის“ ლიდერი ნინო ბურჯანაძის განმარტებით, „ქართულმა ოცნებამ“ ნდობის თვალსაზრისით ყველა რესურსი ამოწურა.

„რა ხდება, ბიძინა ივანიშვილმა გუშინ გაიგო, რომ ქვეყანა სიღატაკეში იხრჩობა? აღმოჩნდა, რომ UNICEF-ის კვლევით გაიგო თურმე, თუ როგორ ცხოვრობს მისი ხალხი? ეს ხომ ცინიზმია, საკუთარი მოსახლეობის დაცინვა და აბუჩად აგდება?! მე არ მესმის ამას როგორ პატიობს ჩვენი მოსახლეობა ივანიშვილს და მის მთავრობას. ივანიშვილი უკვე ვეღარავის ვერ მოატყუებს და მისი ყველა მცდელობა, ისევ მოისყიდოს, ისევ დაპირდეს, ისევ გამოიყენოს არ გამოუვა. ხალხს თვალიც აეხილა და მოთმინებაც ამოეწურა" - აღნიშნა ბურჯანაძემ.

ნინო ბურჯანაძე აცხადებს, რომ სარალიძის და მაჩალიკაშვილის ტრაგედია გახდა კატალიზატორი, რომ ხალხს პოლიტიკური მოთხოვნები დაყენება.

„ის რომ ხელისუფლება გაღიმებული სახით გვიმტკიცებს, თითქოს პოლიტიკური კრიზისი არ არსებობს, სასაცილოა. როდესაც გენერალური პროკურორი გადადგება, როდესაც ხალხი ითხოვს გადადგეს იუსტიციის მინისტრი და უკან მიჰყვეს სრულიად მთავრობა, როდესაც პრემიერი მივა მიტინგზე და ბოთლებს დაუშენენ, პოლიტიკური კრიზისი სხვა კი არაფერია.

ის დროა, ივანიშვილს და მისი გუნდს ეყოს გამბედაობა და აღიაროს ამ ხელისუფლების დასასრული.“ - აცხადებს ნინო ბურჯანაძე.

„დემოკრატიული მოძრაობის“ ლიდერი ვერ ხედავს იუსტიციის მინისტრის ან სხვა რომელიმე მინისტრის თანამდებობიდან გადაყენების აზრს. ნინო ბურჯანაძე აცხადებს, რომ მინისტრების უკან დგას საშიში და მახინჯი სისტემა, რომელიც ბიძინა ივანიშვილმა შეინარჩუნა და გააძლიერა.

„სამართლის დასამკვიდრებლად, ჩემთვის ერთმნიშვნელოვნად არის მთავარი, ქვეყანაში ჩატარდეს თავისუფალი და დემოკრატიული არჩევნები, ბიძინა ივანიშვილი და „ქართული ოცნება“ კი საბოლოოდ ჩამოშორდეს პოლიტიკას. მხოლოდ ამის შემდეგ შეგვიძლია სამართლიან ქვეყანაში ვიცხოვროთ. ეს რაც უფრო მალე მოხდება, მით მალე გამოვა ქვეყანა ჩიხიდან.“ - აცხადებს ნინო ბურჯანაძე.