"პატრიოტთა ალიანსის" წევრმა, დეპუტატმა ადა მარშანიამ ხორავას ქუჩაზე მკვლელობის საქმის შემსწავლელი დროებითი საგამოძიებო კომისია დატოვა.

მანამდე კი დეპპუტატი დაინტერესდა ფართოვდება თუ არა საკითხთა წრე და იგეგმება თუ არა სხვა მძიმე დანაშაულების გამოძიებაც.

„ეს კომისია ვერ ხედავს, რომ სხვა საქმეებითაც უნდა იყოს დაკავებული. თქვენ მოიშველიებთ ფორმალურ გარემოებას, რომ ეს არც კანონში წერია და არც რეგლამენტში. ჩვენ შევალთ პარლამენტში წინადადებით, რომ შეიქმნას ამდაგვარი კომისია და მე ვნახავ, როგორ დაუჭერთ ამ კომისიის შექმნას მხარს, რომ სხვა საქმეებიც იყოს გამოძიებული. აქედან გამომდინარე, მე ვერ ვრჩები ამ კომისიაში, ვერ ვიმუშავებ იქ, სადაც „ნაციონალური მოძრაობა“ უმრავლესობით ზის, იქ ჩვენ არაფერი გვესაქმება. ეს არის „ქართული ოცნების“ ბრალი. საერთოდ აბსურდამდე და ცინიზმამდე დავდეთ ჩვენ. ეს არის აბსურდის თეატრის გაგრძელება”, – განაცხადა ადა მარშანიამ.

სხდომის თავმჯდომარე სერგი კაპანაძე დაინტერესდა, აგრძელებდა თუ არა დეპუტატი მუშაობას საგამოძიებო კომისიაში.

„თქვენს მიერ მოთხოვნილი საკითხები არ შედის ჩვენს კომპეტენციაში და თქვენს მოთხოვნაზე პასუხი არის, არა”, – მიმართა სერგი კაპანაძემ ადა მარშანიას.

ამის შემდეგ დეპუტატმა აღნიშნა, რომ საგამოძიებო კომისიას ტოვებს.