"შეიყუჟეთ პარტიაში, შეშინებულებმა თუ რა ქნათ ამ პოლიტიკური კრიზისიდან გამოსასვლელად და ოროსანი ბავშვებივით იმართლებდით თავს"

"შეიყუჟეთ პარტიაში, შეშინებულებმა თუ რა ქნათ ამ პოლიტიკური კრიზისიდან გამოსასვლელად და ოროსანი ბავშვებივით იმართლებდით თავს" - სამადაშვილი კობახიძეს

პოლიტიკა - 15:04, 13 Jun, 2018

1328

საპარლამენტო ფრაქციის "ერთიანი ნაციონალური მოძრაობა" წევრ სალომე სამადაშვილის განცხადებით უძრაობის ჭაობში ჩაფლული ქვეყნის მოქალაქეების დიდი უმრავლესობა დღითიდღე ხელისუფლების მიმართ კარგავს რწმენას, მთავრობა კი ცდილობთ არეულობის აჩრდილი შექმნათ და თავად უკეთებს დემონიზირებას ოპოზიციურ პარტიებსა და მათ ლიდერებს, რათა შეინარჩუნოთ ძალაუფლება.

„ბატონო ირაკლი კარგი იქნებოდა სანამ პარლამენტის წევრ ნიკა მელიას ხელბორკილებით გაიყვანდნენ, მაშინ პარლამენტს გახსენებოდა შესაბამისი სანქცია მიეცა ამ ფაქტისთვის.

გაუგებარია, მშვიდობიანი და სანქცირებული აქციის დროს მსგავსი ქმედების განხორციელება, რა საჭირო იყო ამდენი პოლიციელის მობილიზება პარლამენტის შენობასა და მიმდებარე ტერიტორიაზე. თქვენ ხშირად საუბრობთ იმაზე, რომ პოლიტიკური ოპოზიცია ქვეყანაში ცდილობს დესტაბილიზაციის შემოტანას, ცდილობს არეულობის მოწყობას. სინამდვილეში კი, მიჩნდება განცდა, რომ უძრაობის ჭაობში ჩაფლული ქვეყნის მოქალაქეების დიდი უმრავლესობა დღითიდღე ხელისუფლების მიმართ კარგავს რწმენას, თქვენ კი ცდილობთ არეულობის აჩრდილი შექმნათ და თავად უკეთებთ დემონიზირებას ოპოზიციურ პარტიებსა და მათ ლიდერებს, რათა შეინარჩუნოთ ძალაუფლება.

ეს ასე ვერ იქნება ორი მარტივი მიზეზის გამო. „ქართული ოცნება“ პოლიტიკურ ასპარეზს 2012 წელს ორი მთავარი დაპირებით მოევლინა - სწრაფი გამდიდრება და სამართლიანი სისტემის შექმნა. დღეს ქვეყანა გაღატაკებულია. ამ ქვეყანაში არ არსებობს კანონის უზენაესობა და სამართალი, რაც დამტკიცდა სარალიძის მაგალითით და არამხოლოდ. სწორედ ეს არის ჩამოშლა ორი მთავარი საყრდენის, რომელიც გეგონათ შექმენით 2012 წელს. დღეს კი ყველა საქართველოს მოქალაქემ იცის რომ ეს იყო მტკნარი ტყუილი.

ამიტომ თბილისის ქუჩებში უამრავი მოქალაქე გამოდის, რათა გააპროტესტოს ქართული ოცნების მმართველობა და თქვენი ხელისუფლების პირობებში შექმნილი უიმედობა.

როდესაც დათვლას იწყებთ თუ რამდენი ადამიანი გამოვიდა, იქ იწყება ყველაზე სერიოზული კრიზისი ხელისუფლების. ასე რომ, არ მიკვირს, რომ გუშინ 3 საათი შეიყუჟეთ პარტიაში, შეშინებულებმა იმსჯელეთ თუ რა ქნათ ამ პოლიტიკური კრიზისიდან გამოსასვლელად, თუმცა ვერაფერი მოიფიქრეთ და ხალხს ურცხვი ტყუილები მოუყევით ისევე, როგორც ოროსანი ბავშვები იმართლებენ თავს გაკვეთილის უცოდინრობისთვის.

თქვენი პოლიტიკური კრიზისი დასრულდება ქართული ოცნების ხელისუფლების სრული ჩამოშლით ‘’ - განაცხადა სალომე სამადაშვილმა.