საპარლამენტო უმრავლესობის დეპუტატი დავით ჭიჭინაძე ქვეყანაში შექმნილი სიტუაციიდან გამოსავალს მთავრობის გადადგომაში ხედავს. ჭიჭინაძის განცხადებით, ცვლილებები საჭიროა.

„მე გუშინაც ვამბობდი და დღესაც ვაფიქსირებ, რომ ცვლილებები საჭიროა, განსაკუთრებით, როდესაც გამოქვეყნდა „იუნისეფის“ კვლევები, იქ არის გაუარესებული ეკონომიკური მდგომარეობა, შესაბამისად ჩვენ ვფიქრობთ, რომ როდესაც ჩვენ შევქმენით კომისია, არ ვენდეთ უმრავლესობას, სამწუხაროდ და, ვენდეთ ოპოზიციას, რომ ოპოზიცია დაადგენს, თურმე, სიმართლეს ამ ქვეყანაში და ჩვენ ამის უნარი არ შეგვწევს, პლუს, როდესაც ჩვენ ეკონომიკას ვერ ვზრდით, ბანკებს მივეცით საშუალება არანორმალური მოგების და შესაბამისად, ბანკები დღეს კარნახობენი ხელისუფლებას, როგორ უნდა მოიქცეს, პრაქტიკულად ყველა კანონს, რომელსაც ჩვენ ვღებულობთ, ისინი არღვევენ და გვერდს უვლიან, ვფიქრობ, რომ ხალხში გროვდება დიდი უკმაყოფილება და ყოველთვის ერთადერთი გამოსავალი არის მთავრობის გადადგომა. კრიზისის გახსნის და საერთოდ, ასეთი დაძაბულობის მოხსნის საშუალება არის, როდესაც მთავრობა გადადგება, წარმოდგენილი იქნება ახალი პროგრამა, თუ ამანაც არ უშველა, შემდეგ სხვა ეტაპებია და ვფიქრობ, ყველაფერი უნდა გამოვიყენოთ იმისათვის, რომ საზოგადოებაში ის ნდობა და მხარდაჭერა აღვადგინოთ, რომელიც თავის დროეზე გააჩნდა „ქართულ ოცნებას“, - განაცხადა დავით ჭიჭინაძე.