"გადავწყვიტეთ, წარსული უკან მოვიტოვოთ" - ტრამპი-კიმ ჩენ ინის შეხვედრა შეთანხმებაზე ხელმოწერით დასრულდა

მსოფლიო - 13:25, 12 Jun, 2018

3062

ისტორიული შეხვედრა შედგა.

აშშ-ის პრეზიდენტი დონალდ ტრამპი და ჩრდილოეთ კორეის ლიდერი კიმ ჩენ ინი სინგაპურში, კუნძულ უნძულ სენტოსაზე, სასტუმრო "კაპელაში" შეხვდნენ ერთმანეთს და კორეის ნახევარკუნძულის ბირთვული განიარაღების შესახებ ერთობლივ შეთანხმებას მოაწერეს ხელი.

დონალდ ტრამპის თქმით, ამაში მათ დიდი მომზადება და შრომა ჩადეს და დღევანდელი დღით ძალიან ამაყობს.

"ჩემი აზრით ჩვენი ჩრდილოეთ კორეასთან ურთიერთობა სრულიად განსხვავებული იქნება იმისაგან, რაც წარსულში იყო და ნახევარკუნძულზეც სრულიად განსხვავებული სიტუაცია იქნება."

ჩვენ შესანიშნავი დღე გვქონდა, ბევრი ვისწავლეთ ერთმანეთის და ჩვენი ქვეყნების შესახებ. მე ახლა ვიცი, რომ ის ძალიან ნიჭიერი კაცია და ძალიან უყვარს საკუთარი ქვეყანა" - განაცხადა ტრამპმა და აღნიშნა, რომ კიმ ჩენ ინს თეთრ სახლში დაპატიჟებს.

თავის მხრივ, დონალდ ტრამპს მადლობა გადაუხადა კიმ ჩენ ინმა შეხვედრისთვის.

"დღეს ისტორიული შეხვედრა გვქონდა. გადავწყვიტეთ, წარსული უკან მოვიტოვოთ. მსოფლიო დიდ ცვილებებს ნახავს. მინდა მადლიერება გამოვხატო პრეზიდენტ ტრამპის მიმართ, იმისთვის, რომ ეს შეხვედრა შესაძლებელი გახადა" - თქვა კიმ ჩენ ინმა შეხვედრის შემდეგ.

მედიაში მათი ხელმოწერილი შეთანხმების ფოტოც გავრცელდა, რომელიც 4 პუნქტს მოიცავს.

1. აშშ და ჩრდილოეთ კორეა იღებენ ვალდებულებას, დაამყარონ ახალი ამერიკულ-ჩრდილო კორეული ურთიერთობები, მშვიდობისა და ორივე სახელმწიფოს აყვავების სურვილის შესაბამისად.

2. აშშ და ჩრდილოეთ კორეის დემოკრატიული რესპუბლიკა ერთობლივად იმუშავებენ კორეის ნახევარკუნძულზე ხანგრძლივი და სტაბიულური მშვიდობიანი რეჟიმის შესაქმნელად.

3. მხარეები ამტკიცებენ 2018 წლის 27 აპრილის ფხანმუნჯომის დეკლარაციას, სადაც ჩრდილო კორეა კორეის ნახევარკუნძულის სრული ბირთვული განიარაღების ვალდებულებას იღებს.

4. აშშ და ჩრდილოეთ კორეა იმუშავებენ ომის ტყვეთა ნეშტების აღმოჩნაზე და ამოცნობილთა დაუყოვნებლივ რეპატრიაციაზე.

დოკუმენტის დასკვნით ნაწილში ხაზგასმულია სინგაპურის „ეპოქალური“ შეხვედრის ისტორიული მნიშვნელობა, რომელიც „ახალ მომავალს უხსნის კარს“.