"ჩვენი ამოცანა ის კი არაა, რომ მიტინგის დარბევის დროს 6 კაცის მაგივრად 3 კაცი შემოგვაკვდეს, არამედ ის, რომ საერთოდ არ დავარბიოთ მიტინგი"- კობახიძე

პოლიტიკა - 10:27, 12 Jun, 2018

1659

ირაკლი კობახიძის თქმით, ხელისუფლებას ხშირად უწევს წარსულზე საუბარი, რაც ნამდვილად არ არის კარგი. მისი შეფასებით წინა 9 წელთან შედარება არასწორია და აქცენტი დღევანდელობაზე უნდა გაკეთდეს. ამის შესახებ საქართველოს პარლამენტის თავმჯდომარემ გუშინ ბიუროს სხდომაზე ისაუბრა.

ირაკლი კობახიძის თქმით, სამწუხაროდ, ისე ხდება, რომ ხშირად მაინც არის საუბარი 9 წელზე. მისი შეფასებით, წინა 9 წელთან შედარებაც კი არასწორია.

„სამწუხაროდ, ისე ხდება, რომ მაინც გვიწევს საუბარი 9 წელი, 6 წელი და ასე შემდეგ. შედარებაც არასწორია. ამაშიც გეთანხმებით. არასწორია, ნამდვილად, შედარება წინა 9 წელთან. ჩვენ არ უნდა ვიყოთ იმ 9 წელზე უკეთესი - ეს იქნებოდა აბსოლუტურად არაამბიციური და არაადეკვატური მიზანი. ჩვენი ამოცანა ის კი არ არის, რომ იმ 9 წელზე უკეთესი ვიყოთ, ამოცანა ის კი არ არის, რომ მიტინგის დარბევის დროს 6 კაცის მაგივრად 3 კაცი შემოგვაკვდეს, ამოცანა არის ის, რომ საერთოდ არ დავარბიოთ მიტინგი და საერთოდ არ მოკვდეს არავინ ძალადობის გამოყენების დროს. ამოცანა ის კი არ არის, რომ ადამიანის უფლება დაირღვეს, მაგრამ იმაზე ნაკლებად, ვიდრე თქვენ არღვევდით, ამოცანა არის ის, რომ საერთოდ არ დავარღვიოთ ადამიანის უფლებები. ეს არის ამოცანა, ეს არის სტანდარტი. ამოცანა ის კი არ არის, რომ დეპუტატი არ შემოგვაკვდეს და სასიკვდილოდ არ ვცემოთ, ამოცანა არის ის, რომ საერთოდ არ შევეხოთ ფიზიკურად პარლამენტის არცერთ წევრს“, - განაცხადა ირაკლი კობახიძემ.