მოზარდების მკვლელეობა ხორავას ქუჩაზე - მოკლული დავით სარალიძის მამა ზაზა სარალიძე მერაბ მორჩაძის დაკავების ფაქტს ეხმაურება და აცხადებს, რომ ძალოვანი უწყება მსგავსი ქმედებით ცდილობს საქმის ერთ-ერთი მოწმის მ.კ.-ს დაკავების საფუძველი აღარ იყოს, იმის წარმოჩენით, რომ მან ცრუ ჩვენება ზეწოლის ქვეშ მისცა.

„გიორგი გახარიას არაფერი დაუძრავს, რა სისულელეა. ეს გადადგმული ნაბიჯები იყო სისულელე . მორჩაძე რომ დააკავეს ვიღაც, ამით ცდილობენ, მოწმის ჩვენება „გააპრავონ“, თითქოს მან ზეწოლის ქვეშ მისცა ცრუ ჩვენებები სასამართლოს, რომ მისი დაკავების საფუძველი აღარ ჰქონდეთ“, – განაცხადა ზაზა სარალიძემ.

ზაზა სარალიძე იუსტიციის მინისტრის, თეა წულუკიანის გადადგომას მოითხოვს:

„ვითხოვ, ასევე წულუკიანის გადადგომას იქიდან გამომდინარე, რომ შოთაძე გაუშვა ტაშ-ფანდურით, ტაში დაუკრა. გუშინ კომენტარიც წავიკითხე, არ უნდა გადამდგარიყოო. თუ არ უნდა გადამდგარიყო, არ გადამდგარიყო, რა პრობლემაა და თუ გადადგა, პასუხისგებაში რატომ არაა მიცემული იმ დანაშაულისთვის, რა დანაშაულიც ჩაიდინა“, – განაცხადა სარალიძემ.

მისი თქმით, დაუჯერებელია, რომ ყოფილმა მთავარმა პროკურორმა ირაკლი შოთაძემ არ იცოდა აღნიშნულის შესახებ.

„ვინმეს სჯერა, რომ შოთაძემ არ იცოდა ამ საქმის ამბავი და საქმე როგორ იკერებოდა. წულუკიანის არჩეული მეხუთე პროკურორია მგონი, რომელმაც არ გაამართლა. ე.ი. არ არის კომპეტენტური ამ საქმეში და უნდა წავიდეს“, – განაცხადა ზაზა სარალძემ.