პარლამენტის წინ ზაზა სარალიძის და მალხაზ მაჩალიკაშვილის მხარდამჭერი აქცია მიმდინარეობს. აქციის მონაწილეებს მიმართა პროდიუსერმა მიშა მშვილდაძემ.

„სისტემამ გაჭყლიტა ზაზა სარალიძე. სისტემა არ აძლევს შესაძლებლობას, რომ იპოვოს სიმართლე. სარალიძეს სისტემა დასცინის, სისტემა ამასხარავებს, სისტემა ეთამაშება, სისტემა არ უდგება სერიოზულად და სისტემა არ ასრულებს თავის ფუნქციას.

ამ სისტემის უკან ერთი ადამიანი დგას და ეს ადამიანი ბიძინა ივანიშვილია. ეს არის ბრძოლა - ერთი ადამიანის სიმართლე უფრო ძლიერია თუ ერთი ადამიანის სისტემა. ერთი ადამიანი უფრო პრინციპული იქნება, უფრო მეტს მოითმენს, უფრო ზუსტად შეძლებს ბრძოლის წაყვანას თუ უფრო ეშმაკი და შენძრეული იქნება და სწორად გადმოყრის რაღაც ბარტყებს, ჭანჭიკებს იმ სისტემის, რომლებიც არაფრად არ უღირს არც იმათ და არც ჩვენ.

ეს არის ბრძოლა სიყალბესა და გულწრფელობას შორის და ჩვენი ვალია, რომ ამ ბრძოლაში გაიმარჯვის სიმართლემ.

ჩვენ აქ იმიტომ ვართ, რომ ერთ კონკრეტულ ადამიანს გამოვუცხადოთ მხარდაჭერა და დავუბრუნოთ ადამიანების იმედი, რომ ჩვენც ვარსებობთ, ჩვენ გვესმის მისი, ჩვენ ვუდგავართ მას გვერდით და ჩვენ დავეხმარებით თავისი სიმართლის პოვნაში.

ბოლოს, მინდა, მივმართო თვითონ ბიძინასაც. არ ვიცი, როგორ დამთავრდება კონკრეტულად ეს დღე, ეს ბრძოლა. ეს ბრძოლა გაგრძელდება და კიდევ ბევრი ბრძოლა იქნება, ბიძინა, შენ შეიძლება მოიგო ბრძოლა ერთი, მოიგო ბრძოლა ორჯერ, მოიგო სამჯერ, მაგრამ ომს შენ ვერ მოიგებ, იმიტომ, რომ არავის მოუგია ომი საკუთარ ხალხთან“ - განაცხადა მშვილდაძემ.