გომბორის უღელტეხილზე დრეს მომხდარი ავარიის შედეგად დაშავებული პირები განათლებისა და მეცნიერების მინისტრმა თელავის რეფერალურ საავადმყოფოში მოინახულა.

ჟურნალისტებთან საუბრისას მიხეილ ჩხენკელმა განაცხადა, რომ ექსკურსიებთან დაკავშირებული რეგულაციები გასამკაცრებელია:

“მიუხედავად იმისა, რომ ეს ექსკურსია თვითორგანიზებული იყო, ცალსახად გასამკაცრებელია ექსკურსიებთან დაკავშირებული რეგულაციები, ასე აუცილებელია ესკორტის თვალსაზრისით, მძღოლებისთვის, რომლებიც ახორციელებენ ბავშვთა გადაყვანას სპეციალური ნებართვის გაცემა. როგორც კი დავბრუნდები თბილისში, შევხვდები შინაგან საქმეთა მინისტრს გიორგი გახარიას და განვიხილავთ ბავშვთა ტრანსპორტირების უსაფრთხოების საკითხებს" , - განაცხადა განათლების მინისტრმა.

შეგახსენებთ, რომ დღეს გომბორის უღელტეხილზე ექსკურსიაზე მიმავალი მიკროავტობუსი გზის სავალი ნაწილიდან გადავიდა და ხევში გადავარდა, შედეგად გარდაიცვალა 4 ადამიანი და დაშავდა 21. მომხდარზე გამოძიება სსკ-ის 276-ე მუხლის მეშვიდე ნაწილით მიმდინარეობს. სამართალდამცავებმა მიკროავტობუსის მძღოლი დააკავეს.