ბათუმში საბაგირო გზა გაიხსნა

საზოგადოება - 15:30, 16 Aug, 2013

611

საზეიმო გახსნის ცერემონიალს აჭარის ა.რ. მთავრობის თავმჯდომარესთან ერთად აჭარის მინისტრთა კაბინეტის, ქალაქ ბათუმის მერიისა და საკრებულოს, შსს აჭარის რეგიონალური სამმართველოს, აჭარის უმაღლესი საბჭოსა და საკონსულოების წარმომადგენლები დაესწრნენ.

საბაგირო გზას ბათუმიდან მგზავრი გასართობ ცენტრ "არგომდე" მიჰყავს, რომლის მშენებლობაც 2010 წლის 13 ივნისს დაიწყო, ხოლო საბაგირო ზოლის - 2012 წლის 10 აპრილს. სამშენებლო სამუშაოებს ავსტრიული კომპანია "დობერმაიერი" ასრულებდა, რომელიც მთლიანად კურირებდა საბაგირო დანადგარების შესყიდვასა და დამონტაჟებას. ბათუმის საბაგირო გზა კომპანია "ჰესტოკ-ბათუმის" საკუთრებაა, რომელმაც ამ პროექტით 23 მილიონი ლარის ინვესტიცია განახორციელა.

2600 მეტრის სიგრძის საბაგირო გზაზე ამ დროისათვის 8 გონდოლა მოძრაობს, თუმცა გათვლილია 22 გონდოლაზე. ის ზღვის დონიდან 260 მეტრის სიმაღლიდან დაეშვება და საათში 500 ადამიანს მოემსახურება. ფერიის მთიდან დაშვება მსურველთათვის უფასოა, ხოლო ბათუმიდან მგზავრობის ფასი 3 ლარს შეადგენს.

"კომპანიას ჰქონდა ვალდებულება 29 ივლისამდე დაესრულებინა ეს პროექტი, რაც შესრულდა კიდეც და 29 ივლისისათვის ის უკვე მზად იყო ექსპლუატაციაში შესასვლელად. შეგვეძლო რამდენჯერმე გაგვეხსნა ზოგ-ზოგიერთებივით, მაგრამ ეს არ გავაკეთეთ მანამ, სანამ უსაფრთხოების ყველა ზომა არ იქნა გათვალისწინებული. ამჟამად საბაგირო ამუშავდა. მომავალი სეზონისთვის გვსურს ობიექტი მზად იყოს სავაჭრო ობიექტებითა და გასართობი ცენტრით." - განაცხადა არჩილ ხაბაძემ.