"ყველას დავიბარებთ ვინც ამ საქმეში ფიგურირებს, არავის არ აქვს იმუნიტეტი"- სერგი კაპანაძე

პოლიტიკა - 13:24, 08 Jun, 2018

1328

პარლამენტში შექმნილი საგამოძიებო კომისიის თავმჯდომარე სერგი კაპანაძე აცხადებს, რომ კომისიაზე დაიბარებენ ყველა იმ პირს, ვინც საქმეში ფიგურირებს.

"ზაზა სარალიძემ კომისიასთან, თანამშრომლობის სრული მზადყოფნა გამოთქვა 24 საათიან რეჟიმში. ჩვენ გვექნება ოფიციალური სხდომა და ჩვენს საქმიანობას ფორმალურად შევუდგებით. ძალიან მნიშვნელოვანია ყველა მასალა დროულად მივიღოთ. დღესვე ველოდებით, რომ ეს მასალები იქნება მოწოდებული, ბატონ ზაზას ბევრჯერ დაუსახელებია კონკრეტული გვარები და ვერსია რაც მოხდა, სწორედ ამაზე ვისაუაბრეთ. ჩვენ მოვუსმენთ ყველა მხარეს, საშუალება გვექნება ეს ინფორმაციები შევაჯეროთ და მთელი პასუხისმგებლობით შემიძლია გითხრათ, რომ ყველა ინფორმაციაზე დაყრდნობით, კომისია ჯამში გადაწყვეტილებას მიიღებს იმ მიზნით, რომ სიმართლე იქნას გამოკვლეული. ძალიან მალე სია იქნება ცნობილი, ვის დავკითხავთ, მაგრამ ჩემი პოზიციაა, რომ ყველა ადამიანი, ვინც ამ საქმეში ფიგურირებს, იქნება დაბარებული. იმუნიტეტი არავის არ აქვს, ეს ყველამ კარგად უნდა იცოდეს. ამ საკითხის მიმართ ზაზა სარალიძის დამოკიდებულება ძალიან კარგად მესმის. კარგი იქნებოდა, რომ „ქართულ ოცნებას“ შესაბამისი გადაწყვეტილება თავის დროზე მიეღო. ახლა კომისია მუშაობას გააგრძელებს, ჩვენს შორის თანამშრომლობა იქნება. ბესელია რა გადაწყვეტილებას მიიღებს და როგორს, ეს მათ უნდა ჰკითხოთ. ილუზია არავის ჰქონდეს, რომ ან თავისი პოლიტიკური პოზიციიდან გამომდინარე, ან თავისი ეგოდან გამომდინარე, კომისიის მუშაობას როგორმე გააჭიანურებენ. ჩემი ამოცანაა, კომისიამ შეუფერხებლად იმუშაოს და არავინ აღუდგეს მუშაობას წინ. მოლოდინი გვაქვს, რომ მტკიცებულებები უმოკლეს ვადაში იქნება მოწოდებული "- განაცხადა სერგი კაპანაძემ.