მირზა სუბელიანის თიტქმის 9 საათიანი დაკითხვა შინაგან საქმეთა სამინისტროში დასრულდა, მან ძალოვანი უწყების შენობა უკვე დატოვა.

,,გავეცი შესაბამისი პასუხები, რამდენჯერაც დამიბარებენ, მივალ" - განაცხადა სუბელიანმა. მან დამატებითი კომენტარი არ გააკეთა და განაცხადა, რომ შსს გაუთქმელობის ხელწერილით დატოვა. მისივე თქმით, მან გამომძიებლებს ახალი ინფორმაციები მიაწოდა.

რაც შეეხება მის შესაძლო დაკავებას, მირზა სუბელიანი ამბობს, რომ ,,გამორიცხული არაფერია".

მირზა სუბელიანს გარდაცვლილი მოზარდების ახლობლები, დავით სარალიძის მამა ზაზა სარალიძე მტკიცებულებების გაყალბებასა და დანაშაულის დაფარვაში ადანაშაულებდნენ.

მირზა სუბელიანი დღეს შინაგან საქმეთა სამინისტროში დაკითხვაზე მეორედ დაიბარეს, მისი დაკითხვა რამდენიმე საათის განმავლობაში მიმდინარეობდა. მირზა სუბელიანის არასრულწლოვანი შვილი მოზარდების მკვლელეობის საქმეში ერთ-ერთი თვითმხილველია.

მირზა სუბელიანი პროკურატურაში მაღალ თანამდებობაზე მუშაობდა, სწორედ მკვლელეობიდან რამდენიმე დღეში მან თანამდებობა დატოვა.

გამოძიების ინფორმაციით, სწორედ მირზა სუბელიანის არასრულწლოვანი შვილის გამო დაიწყო მოზარდებს შორის კონფლიქტი. სისხლიან გარჩევას ორი მოზარდი ლევან დადუნაშვილი და დავით სარალიძე ემსხვერპლა.

შეგახსნებეთ, რომ სასამართლომ გასულ კვირას საქმეზე დაკავებულ ორ მოზარდს განაჩენი გამოუტანა. ერთი ბრალდებული ლევან დადუნაშვილის ეპიზოდში გამტყუნდა, დავით სარალიძის ეპიზოდში კი გამართლდა, მეორე ბრალდებული კი დადუნაშვილის ეპიზოდში გამართლდა და სარალიძის ეპიზოდში გამტყუნდა, მაგრამ სისხლის სამართლის კოდექსის მუხლი გადაკვალიფიცირდა და მას ბრალი განზრახ მკვლელეობის მცდელობის მუხლით დაედო.

აღნიშნულის შემდგომ მოკლული დავით სარალიძის მამის ზაზა სარალიძის მხარდამჭერი მასშტაბური აქციები დაიწყო, შედეგად თანამდებობიდან გადადგა მთავრი პროკურორი ირაკლი შოთაძე. ზაზა სარალიძე შოთაძის პასუხისგებაში მიცემას მოითხოვს. ასევე მოითხოვდა მირზა სუბელიანის და ყველა იმ პირის დასჯას, ვინც მკვლელეობის საქმის მტკიცებულებების გაყალბება და დანაშაულის დაფარვა სცადა.