ერგნეთში ინციდენტების პრევენციისა და მათზე რეაგირების მექანიზმების ფარგლებში მორიგი შეხვედრა დასრულდა.

შეხვედრაზე 9 საკითხი იქნა განხილული, როგორც შეხვედრის დაწყებამდე ქართული მხარის წარმომადგენელმა განაცხადა, ერთ-ერთი მთავარი განსახილველი საკითხი იქნებოდა არჩილ ტატუნაშვილის მკვლელობის საქმე და სამხარაულის ექსპერტიზის ბიუროს დასკვნა.

ოკუპირებული ცხინვალის წარმომადგენელმა განაცხადა, რომ ქართულ მხარეს მათთვის ექსპერტიზის დასკვნა არ გადაუცია. დე ფაქტო ხელისუფლების წარმომადგენელმა ეგორ კოჩიევმა განაცხადა, რომ ის ენდობა ოსური ექსპერტიზის ბიუროს დასკვნას და მან მხოლოდ ქართულ მედიაში გავრცელებული ინფორმაცია შეიტყო ტატუნაშვილის სხეულზე არსებული დაზიანებების შესახებ.

„დღევანდელ შეხვედრაზე ითქვა, რომ ქართულ მხარეს აქვს ექსპერტიზის დასკვნა, მაგრამ მე ის არ მინახავს პრინციპში, არც მჭირდება, რადგან ჩვენ ჩვენი დასკვნა გვაქვს , სადაც დეტალურად არის აღწერილი ყველაფერი როგორც ქართული მედიის პუბლიკაციიდან გავიგე ისინი ადასტურებენ დაზიანების აღწერას, რომელიც მოცემულია სამხრეთ ოსეთის დასკვნაში.

ვერ გეტყვით შემიძლია ვენდო თუ არა ქართული მხარის ექსპერტიზის დასკვნას, რადგან პირველი - ის მე არ მინახავს და მეორე არ მაქვს საფუძველი გადავამოწმო სიმართლეს შეესაბამება თუ არა. ჩვენ გვაქვს ექსპერტიზის დასკვნა, რომელსაც ბოლომდე ვენდობი“- განაცხადა ეგორ კოჩიევმა.