,,ისინი არიან ამ ხელისუფლების მაღალჩინოსნების ყოფილი მეგობრები" - ვის შეხვდა ზვიად კუპრავა ევროპაში და რა ინფორმაცია მიიღო მოზარდების მკვლელობის საქმეზე

პოლიტიკა - 17:58, 06 Jun, 2018

6559

„სამართალდამცველთა რეფორმირების ცენტრის" ხელმძღვანელი, ზვიად კუპრავა ევროპიდან თბილისში დაბრუნდა და მედიასთან პირველი კომენტარი გააკეთა.

კუპრავას განცხადებით, ის შეხვდა ხელისუფლების მაღალჩინოსნების მეგობრებს, მათ შორის მირზა სუბელიანის და სოზარ სუბარის ახლობლებს. კუპრავას თქმით, ეს ის ადამიანები არიან, რომლებისგან ის ხორავას ქუჩის საქმის ირგვლივ ინფორმაციებს იღებდა.

"მსგავსი ტიპის შეხვედრებს მე ვაწარმოებდი სისტემატიურად, საქართველოს ტერიტორიაზე, თუმცა უსაფრთხოებიდან გამომდინარე, ვინაიდან მაღალი იყო სუს-ის ინტერესი ჩემს მიმართ და ჩემი შეხვედრების მიმართ, გადავწყვიტეთ რომ ეს შეხვედრა ჩატარებულიყო საზღვარგარეთ. მე ვხვდებოდი ხელისუფლების კონკრეტული მაღალჩინოსნების ყოფილ მეგობრებს, რომელთა მხრიდანაც მიღებული ინფორმაციის საფუძველზე მე თუნდაც მირზა სუბელიანთან, და სოზარ სუბართან და სხვებთან მიმართებით ვაჟღერებდი. ამ ადამიანებთან შეხვედრა საზღვარგარეთ იმიტომ გადაწყდა, რომ უსაფრთხოება მაქსიმალურად ყოფილიყო დაცული..." - აცხადებს კუპრავა.

რა ინფორმაცია მიიღო დამატებით ხორავას ქუჩაზე მოზარდების მკვლელობის საქმესთან დაკავშირებით უცნობია, თუმცა კუპრავას თქმით, მათ ბევრ მნიშნელოვან ინფორმაცია მიუწვდებათ ხელი.

"არ ვიცი არიან თუ არა ისინი პარტიული წევრები, მაგრამ ვიცი, რომ წვდომა აქვთ ბევრ რამეზე. მათ შორის ყოფილი, მაღალჩინოსნებიც არიან... უკრაინა იყო ნეიტრალურ ზონაში, რადგან ტრანზიტით ჩამოვედი. უკრაინის საზღვარი არ გადამიკვეთავს"- თქვა კუპრავამ.